БИШКЕК, 23-мар — Sputnik. Күч түзүмдөрүнүн ардагери Токтогул Какчекеев Sputnik кабарчысынын суроолоруна жооп берип жатып, БА өлкөлөрүнүн арасында Тажикстан алсыз жана дал ушул себептен ИМ согушчандары аталган мамлекеттин чек арасына жакын жерде активдешип жатат деди.
Мурдараак "Россия сегодня" ЭМАнын баяндамачысы Андрей Правов КМШга чектеш Афганистанда январда "Ислам мамлекетинин" согушчандары пайда болгондугу жөнүндө кабарлаган эле.
— Афганистан Түркмөнстан жана Өзбекстан менен чектеш. Эмне үчүн январда Афганистанда пайда болгон ИМнын согушчандары Тажикстандын чек арасын көздөй жылып жатышат?
— Бүгүнкү күндө алар стратегиялык тапшырмаларын пландуу түрдө аткарып жатат. БА өлкөлөрүнүн арасында Тажикстан алсыз экендиги баарына белгилүү. Фергана өрөөнүндөгү экстремисттик күчтөрдүн ТРда ички колдоочулары бар. Албетте сегиз жылга созулган жарандык согуш жана бул Борбордук Азиядагы ислам партиясы бар жалгыз республика экендиги өз таасирин тийгизбей койгон жок.
БА менен Кыргызстанда айрыкча акыркы беш жылдан бери күчтүү жөлөк-тиреги бар үчүн, экстремисттик багыттагы ислам кыймылы юстиция министрликтеринде каттоого туруп алып максаттуу иш алып барууда.
Белгилей турган нерсе, "Хизб ут-Тахрир", "Жин булат" сыяктуу кыймылдар пакистандык диний окумуштуу Маудуди тарабынан ислам күчтөрүн баш коштуруп, БА мамлекеттеринде ислам башкармалыгын кайтаруу максатында ишке киргизилген болчу. Аталган дин кызматкери, баса, көп нерселерди большевисттик теориядан алып, электоратты башкаруу идеяларын өзүнүн диний окууларында пайдаланган.
Анын окуусунун негизги алдыга койгон милдети Россия менен Борбордук Азиянын "жолдон адашкан" ислам өлкөлөрүн кайра ислам жолуна салуу болуп эсептелет. Муну аткаруу үчүн болсо ислам коомчулуктарын активдештирүү зарыл. Биз азыр Кыргызстанда, Казакстанда ж.б. БА өлкөлөрүндө, ошондой эле Сирия менен Афганистанда дал ушуну көрүп жатабыз.
Афганистан жөнүндө айтсак, ал жерде согуш жүрүп жатканына эки кылымдан ашты. Афган балдары исламдын душмандарына жана деги эле четтен келгендерге жек көрүү сезимин эненин сүтү менен кошо алышат.
Анан оңдой берди болуп, "Ислам мамлекети" чыга келди. Анда бронетанк, авиация жана ракеталык техника боюнча адистер бар. ИМдин согушчандарынын белгилүү бир ийгиликтерге жетишүүсү Европа, Америка, Африка жана Түштүк-Чыгыш Азия мамлекеттеринин мусулмандарын өзүнө магниттей тартып жатат.
Коопсуздук максатында ТРда Россиянын 201-дивизиясы турат. Жана ЖККУнун башкы катчысы Николай Бордюжа аталган уюмдун күчтөрү менен каражаттарын Тажикстанга үч күндө жеткирүү мүмкүнчүлүгү жөнүндө мурдараак билдирген.
Өзгөчө белгилейин дегеним, бул биздин жаныбызда эле көз көрүнөө болуп жаткан нерселер. ИМ топтору КМШнын чек арасына жакын пайда болушу америкалыктардын ийгилиги, себеби кантсе да бардык экстремисттик кыймылдарды АКШ менен анын атайын кызматтары тиги же бул түрдө колдоп жатпайбы.
ИМдин же башка экстремисттик топтордун согушчандары басып кире турган болсо, эч ырайымсыз жана жок кылгыдай чараларды көрүү керек деп эсептейм. Мында бардык каражаттар: артиллерия, ракеталык сокку жана авиация колдонулушу зарыл.
Эч кимди аёонун кереги жок, болбосо өзүбүзгө эле жаман.
