БИШКЕК, 17-мар. — Sputnik. Түркияда дарылануу үчүн квота бөлүүдөгү паракорчулукка чекит коюлганын КР Саламаттык сактоо министрлигинин Медициналык жардам көрсөтүү жана дары саясаты боюнча башкармалыгынын жетекчиси Анарбүбү Ешходжаева маалымат жыйында билдирди.
Буга чейин бир катар ЖМКларга эксперттик комиссия тизмеге кошуу үчүн пара талап кылып жатат деген маалыматтар чыгып кеткен болчу.
Ешходжаеванын айтымында, Түркияда дарылануу үчүн бейтаптарды тандоо ачык-айкын болот. Келишимге ылайык, бейтаптар Түркияга баруу жол-киресин, ал жакта жашай турган жайдын акысын өздөрү төлөйт. Ошондой эле донорго кеткен чыгымды жана трансплантациядан кийинки процедураларга кеткен каражатты төлөшү керек. Балким, ушундай жагдайдан улам имиштер чыгып кетиши мүмкүндүгүн Ешходжаева белгиледи.
"Чыгымдар боюнча суроолор ведомстволор аралык комиссиянын мүчөлөрүнө да берилген. Алар өз кезегинде ар бир бейтап үчүн баа жеке түрдө эсептелерин айтышкан. Ушундай жагдайдан улам имиштер чыгышы мүмкүн", — деди Ешхождаева.
КР Саламаттык сактоо министрлигинин маалыматына ылайык, Түркияда дарылануу үчүн 416 арыз келип түшкөн. Анын 112 арызы каралып, Түркиянын макулдугун алуу үчүн жөнөтүлгөн.
