БИШКЕК, 16-мар. — Sputnik. Саламаттыкты сактоо министри Талантбек Батыралиев жарандарды анын кызматкерлеринин Түркияда бекер дарыланууга берилген квота боюнча акча талап кылган учурлар болсо, дароо кайрылууну айтты. Бул туурасындааталган министрликтин маалымат кызматы кабарлады.
Маалыматтарга караганда, акыркы учурда бир катар саясатчылар Саламаттыкты сактоо министрлигинин кызматкерлеринин Түркияда бекер дарыланууга берилген квота боюнча коррупциялык иштерге катыштыгы бардыгын айтышууда. Бул туурасында министр Батыралиев жалпыга маалымдоо каражаттарына түшүндүрмө берди.
"Бекер дарыланууга жибериле тургандар тизмеге Жогорку Кеңештин депутаттарынын, жарандык сектордун, бөйрөк оорусунан жапа чеккен пациенттердин катышуусу менен атайын комиссиянын отурумунда киргизилет", — деп билдирди министр.
Анын айтымында, түркиялык тарап пациенттердин алардын аймагында дарылануусуна кеткен чыгымдарды гана өзүнө алат. Калгандарын — учуп барган жолдун каражатын, донор табууну (эгерде бөйрөк алмаштырыла турган болсо), тамак-аш, жатакана, аларды коштоп жүрүүчү адамдардын, негизги дарылоо башталганга чейинки медициналык процедуралардын чыгымдарын пациент өзү чечет.
Эгерде Саламаттыкты сактоо министрлигинин кызматкерлери же комиссия мүчөлөрү тарабынан акча талап кылуу же дагы башка фактылар кездешсе, министр дароо жеке өзүнө кайрылууну суранды.
"Эгерде аталган фактылар аныкталып калса, күнөөлүүлөргө катуу чара көрүлөт", — деп убада кылды Батыралиев.
Министр коррупциянын алдын алуу боюнча иш-чаралардын алкагында саламаттыкты сактоо тармагында коррупциялык 17 механизм аныкталгандыгын айтты. Аталган тарап бул багытта иш жетишсиз жана майнапсыз жүргүзүлүп жаткандыгын мойнуна алды.
