БИШКЕК, 17-мар. — Sputnik. 19-мартта өтө турган эл аралык XIII тил жана маданият фестивалы КР Маданият, маалымат жана туризм, Билим берүү жана илим министрликтери жана Эл аралык "Себат" билим берүү мекемеси менен биргеликте уюштурулууда.
Бул маданий иш-чарага катышуу үчүн Бишкек шаарына Түркия, Казакстан, Индонезия, Филиппиндер, Таиланд, Индия, Мозамбик, Румыния, Тажикстан, Танзания, Белоруссия, Азербайжан, Грузия, Америка, Косово, Россия жана Украинадан өкүлдөр келишти. Иш-чараны уюштуруучулардын бири Нурлан Кудайбердиевдин айтымында, жогоруда аталган мамлекеттен катышуучулар толук келишти.
"17 мамлекеттин өкүлдөрү учурда Бишкекке келишти. Учурда алар 19-мартта боло турчу гала концертке даярдыктарды көрүп жатышат. Бул фестивалга катышкандар өз тилиндеги чыгармаларды аткарышат", — деди ал.
Эл аралык "Тил жана маданият" фестивалы расмий жана жарандык коомчулуктун колдоосу менен 2006-жылдан дүйнөнүн бир нече мамлекеттеринде уюштурулуп келет. Фестивалдын максаты — дүйнө элдеринин ортосундагы достук жана бир туугандык мамилердин бекемделишин чыңдоо.
