БИШКЕК, 13-мар — Sputnik. Президенттин электр энергиясынын баасын калк үчүн 70 тыйындын деңгээлинде кармоо тууралуу сунушу учурда каралып, ал эсептелип жатканын Отун-энергетика комплексин жөнгө салуу мамлекеттик департаменттин директору Нурбек Элебаев Sputnik сайтынын кабарчысына билдирди.
"Биз учурда бул маселени карап жатабыз. Бүгүн ушул маселе боюнча өкмөттө жыйын болот. Ошондон кийин гана толук жооптуу беребиз. Биз азыр эсептерди чыгарып жатабыз. Бул маселе кайсыл жагынан чыгат, жоготуу болобу, болбойбу алардын бары азыр эсептелип жатат", — деди ал.
Элебаев ошондой эле, орто мөөнөттүк тариф саясат боюнча апрелден тарта электр энергиясынын баасы 70 тыйындан 84 тыйынга чейин көбөйөт деп жазылганын белгиледи.
"Бирок, азыр андай болобу, же жокпу белгисиз. Биз ушул маселени карап жатабыз. Мүмкүн тарифтер ошол бойдон калышы ыктымал", — деди ал.
Отун-энергетика комплексин жөнгө салуу мамлекеттик департаменттин директору Нурбек Элебаев жарандык активисттердин тарифтерди көтөрүү мыйзамсыз болгон, өкмөт Дүйнөлүк банктын гана айткандарын аткарып калды деген дооматын четке какты.
"Ушул маселени азыр сот карайт. Соттун чечими кандай болот белгисиз. Биздин оюбузча тарифтердин бардыгы туура белгиленген болчу", — деди ал.
Белгилей кетсек, апрель айынан тарта электр энергияга болгон баа инфляцияны эске алуу менен кайтадан эсептелип, калк үчүн бир кВт электр энергиясынын баасы 70 тыйындан 84 тыйынга чейин көтөрүлүшү ыктымал делинген болчу.
