БИШКЕК, 16-фев. — Sputnik. №44 мектептин англис тили мугалимине эч ким даттанып, ага карата арыздануулар болгон эмес деп билдирди Sputnik маалымат сайтына аталган мектептин директору Флора Халилова.
Анын айтымында, балдарын өлтүрдү деп шектелип жаткан мугалим аталган мектепте төрт айдан бери иштейт.
"Анын Республикалык психиатриялык борбордо каттоодо тургандыгын билген эмеспиз, себеби, бул деген абдан жашыруун сактала турган маалымат, ал медициналык китепчеде көрсөтүлбөйт. Майыптыгы жок болчу. Мектепте иштеп жүргөндө өзүн жакшы жактан көрсөтчү. Ага ата-энелер тарабынан эч кандай даттануулар болгон эмес. Ишке өз учурунда келчү", — деп айтып берди Халилова.
Директор андан сырткары мугалимди ишке алганда жогорку окуу жайды аяктагандыгы туурасында маалымат, эмгек китепчеси, паспортунун көчүрмөсү, флюрографиядан жана терапевт дарыгердин кароосунан өткөндүгү жазылган медициналык китепчеси талап кылынаарын билдирди.
"Анын психикалык ден соолугу туурасындагы маалымат абдан жашыруун сакталгандыктан, аны өзү же анын жакын тууганы гана ала алат. Эгерде биз бул маалыматты атайын жайдан сурай турган болсок, мугалим бизди анын укугун басмырлаганыбыз үчүн сотко бермек. Бизге чейин үч мектепте иштептир. Өткөн жума күнү педагог сабакты кадыресе эле өтүп, анан үйүнө кеткен. Кылмыштын себептери бизге белгисиз, балким, үйүндө бир нерсе болгондур", — деди Халилова.
Бул боюнча кылмыш иши козголуп, окуянын себебин иликтөө максатында сотук-медициналык экспертиза ишин баштады. ИИМдин маалыматы боюнча, ал Республикалык психиатриялык борбордо каттоодо турган жана 2014-жылдын апрель айында дарылануудан өткөн.
