БИШКЕК, 13-фев — Sputnik. "Ата Мекен" фракциясынын депутаттары өз жыйынында "Кыргызалтын" ААКтын башкармалыгынын төрагасынын орун басары Кылычбек Шакировдун "Кумтөр" боюнча айткандарына баа берүүнү сунушташты.
"Ал "Centerra Gold Inc. компаниясынын башкармалыгынын кеңешин өкмөт эч кандай улутташтыруу болбойт деп ишендиргенден кийин алар тынчып калышты деп айтып жатат". Сүйлөшүүлөрдүн жүрүшү жай жана кыйын болуп жаткан чакта, Шакиров мындай билдирүүлөрү менен абалды да начарлатып жатат. Муну чыккынчылык катары баалоого болот. Анын айткандарына баа бериш керек", — деп айтты фракциянын лидери Өмүрбек Текебаев.
Аны менен катар эле фракция лидери үч ай ичинде сүйлөшүүлөр жыйынтык бербесе, анда улутташтыруу боюнча мыйзамды киргизүү зарыл деген макулдашууну парламент жактырды деп билдирди.
"Үч ай ичинде эч ким мындай мыйзам сунуштабагандыктан, аны биздин фракция киргизди", — деп кошумчалады ал.
Андан сырткары фракция башчысы "чындап эле Шакировдун кирешеси бир жылда 200 миң долларбы?" деп кызыкты. Буга министрлер кабинетинин Отун-энергетикалык комплекс жана жер казынасын пайдалануу бөлүмүнүн башчысы Туратбек Жунушалиев Шакиров андай каражат албайт деп жооп кайтарды.
"Бул "Кумтөр" боюнча жумушчу топтун алган айлыгы. Буга чейин ал бир жыл ичинде ушундай акчаны алып келген. Бирок, азыр бул сумма жумушчу топтун мүчөлөрүнүн ортосунда айлык катары бөлүнөт", — деп Жунушалиев ишендирүүгө аракет кылды.
Текебаев бул каражаттар Шакировдун жеке эсебине эмес, "Кыргызалтындын" эсебине түшүшү керектигин билдирди.
Ошондой эле, башкармалыктын төрагасынын орун басары буга чейин алып жүргөн каражаттардын кайтарылышы керектиги тууралуу да маселе көтөрүлдү.
2014-жылдын 6-февралында Жогорку Кеңеш өкмөт менен канадалык Centerra Gold Inc. компаниясынын ортосунда макулдашууга кол коюуну жактырган. Өкмөттөн билдиришкендей, "Кыргызалтындын" үлүшүн реструктризациялаштырууда келишимдердин барында 2009-жылкы келишим негиз кылып алынмак. Кумтөр кенин иштетүү боюнча жаңы шарттарга ылайык, "Кыргызалтын" менен Centerra тең үлүштөгү биргелешкен ишкана түзүшү керек. Учурда кен боюнча сүйлөшүүлөр улантылууда.
"Кыргызалтын" ААКтын 100 пайыз акциясы өкмөткө тийиштүү.
