Кыргызстандык футболчулар россиялыктарды 2:1 эсебинде утушту

© Sputnik / Игорь Руссак / Медиабанкка өтүүАрхив: футбол
Архив: футбол - Sputnik Кыргызстан
Жазылуу
Футбол боюнча Кыргызстандын курама командасы "Шериктештик" оюндарында Россиянын командасын жеңип, өз тайпасында 5 упай менен биринчи болду. Эми Кыргызстандын курамасы чейрек финалда ойнойт.

БИШКЕК, 20-янв — Sputnik. Дүйшөмбү күнү, 19-январда "Шериктештик кубогу — 2015" оюндарынын алкагында 21 жашка чейинки балдар арасындагы беттеште Кыргызстан менен Россия курама командалары ойноп, оюн 2:1 эсебинде кыргызстандыктардын пайдасына аяктады.

Алгачкы голду кыргызстандык футболчу Бактыяр Дүйшөбеков 45 мүнөттө киргизип, оюн эсебин ачты. Биринчи тайм кыргызстандыктардын пайдасына аяктады. Экинчи тайм башталаар замат, тактап айтканда оюндун 49 мүнөтүндө Акрамжон Умаров россиялыктардын дарбазасына айып тобун таамай тээп киргизди.

Оюндун 85 мүнөтүндө россиялык Алексей Евсеев айып тобун тээп, оюн эсеби 2:1 болгон. Бул темп оюндун соңуна чейин сакталып, Кыргызстан курамасы Россиянын командасын утуп алды.

Футбол боюнча Кыргызстандын жаштар курама командасы тарыхта биринчи жолу Россиянын командасын утту жана өз тобунан биринчи орунга чыкты.

"Шериктештик кубогу — 2015" оюндарынын алкагында Кыргызстан Молдованын жана Латвиянын курама командалары менен ойноп, оюн эсептери 1:1 эсебинде аяктап, кыргызстандыктар атаандаштары менен тең чыккан.

Оюндун жүрүшүндө бири-бири менен беттешкен командалардын эсептик көрсөткүчү:

Россия – Латвия 1:0, Россия – Молдова 2:2, Молдова – Латвия 1:1 

3 оюндун жыйынтыгы боюнча Футбол боюнча Кыргызстандын жаштар курама командасы өз тайпасында 5 упай менен биринчи орунга чыгып, "Шериктештик" кубогунун чейрек финалында ойной турган болду. 4 упай менен өз тобунда экинчи болгон Россия курамасы плей-оффко чыкты.

"Шериктештик кубогу — 2015" оюндары 25-январга чейин болот. Оюн U-21 версиясы боюнча өтүп, ага Европа жана Азиядагы 12 мамлекеттин футболчулары катышууда. 

Жаңылыктар түрмөгү
0