БИШКЕК, 15-янв — Sputnik. Кыргызстандын эсеп палатасы борбор шаардын "Жал-Артис" кичи районунда социалдык турак-үйлөрдү берүүдө мыйзам бузуулар болгондугун аныктады деп билдирди Sputnikке ЭПнын мамлекеттик башкы инспектору Дамира Такырбашева.
Кичи район түндүк кореялык компания тарабынан Бишкектин мэриясы бөлүп берген жерлерде курулган. Бул тышкы инвесторлорду тартуу, 5,1 гектар жер аянтында узак мөөнөттү ипотекалык насыялоо аркылуу турак-жайларды долбоорлоп куруу жолу менен ишке ашырылган эле.
Эки тараптын кызматташуусу тууралуу документтерде 15-Жал-Артис кичи районунда 400 (бир жана эки бөлмөлүү) квартиралар социалдык турак-жай болуп эсептелери көрсөтүлгөн. "Бул квартираларды мамлекет республикалык бюджеттин эсебинен субсидиялап, ал максатка 25 миллион сом бөлүнүп берилген болчу. Ар бир квартира 30 пайызга субсидияланып, башкача айтканда, мамлекет ар бирине 5 миң доллар көлөмүндөгү биринчи төлөмдү жүргүзгөн", — деп айтып берди Такырбашева.
2008-жылдын апрелинде өкмөт аталган квартираларды 42 мамлекеттик органга бөлүп берүү боюнча тизмени бекиткен. Анын ичинен президенттин резервине 12 квартира, премьер-министрдин резервине 10, Бишкектин муниципалитетине 20, "Кыргызстандын улуттук электр тармагы” ААК менен "Түндүкэлектро" ААКга экиден, "Промпроект" ААКга төрт, "Кыргызгаз" ААК менен Бишкек газ чарба башкармалыгына төрт квартира тийген.
"Ипотекалык насыялоо менен чарчы метрдин шарттуу баасы курулуштун башындагы келишимге ылайык 360 доллардан ашпоосу керек. Бирок үч жыл өткөн соң турак-жай курулуш департаменти турак үйлөрдү 1 чарчы метрдин баасы 460 доллардан сата баштаган. Бирок квартиралардын баасын өзгөртүү жөнүндө кайра түзүлгөн келишим текшерүүчүлөргө көрсөтүлгөн жок", — деп баса белгиледи Такырбашева.
Эсеп палатасынын башкы инспектору аталган факт кылмыш ишин козгоого негиз болушу мүмкүндүгүн кошумчалады.
