БИШКЕК, 15-янв — Sputnik. Кыргызстандын Эсептөө палатасы 2012-жылы узак мөөнөттүү курулуштун көлөмү көбөйтүлгөн фактыны аныктаганын Sputnik сайтына Эсептөө палатасынын башкы мамлекеттик инспектору Дамира Такырбашева билдирди.
Анын айтымында, мекеменин ишмердиги текшерилип, курулуш-монтаждоо иштеринин көлөмүн жогорулатууга байланышкан мыйзам бузуулар аныкталган.
"Жүргүзүлгөн аудиттин жыйынтыгында, 2012-жылы жана 2013-жылдын 9 айында Нарын, Талас, Чүй облустарындагы курулуштардын көлөмү 10 миллион сомго көбөйтүлүп көрсөтүлгөнү аныкталган. Биз бул каражаттарды калыбына келтирдик", — деди Такырбашева.
Ал билдиргендей, подрядчылардын ишмердигин жана кызмат көрсөтүүсүн текшерүү учурунда мыйзам бузуулар аныкталган, башкача айтканда "Мамлекеттик сатып алуулар жөнүндөгү" мыйзам бузулган. Негизинен бир канча объект бир гана ишкана тарабынан курулган.
"Андыктан мыйзамда талап кылынан тендер өткөрүлгөн эмес деп айтууга болот. Дайыма 38-берене колдонулуп келген. Анда шашылыш жана керек болгон кызматты алуу каралат. Бирок, бул кызматты кантип алууга болот? Курулуш деген бир канча айга чейин созулат да", — деди инспектор.
Эсептөө палатасынын өкүлү курулуш жүргүзүү үчүн тендер өткөрүү керектигин айтып, сметалык эсептөө документациясы жана башка процедуралар көп убакытты алгандыктан, шашылыш иштерди жасоонун кажети жоктугун баса белгиледи.
