БИШКЕК, 13-янв — Sputnik. СССРдин эл артисти Елена Образцованын сөөгү шаршемби күнү, 15-январда Москвадагы Новодевичьево көрүстөнүндө коюлат деп билдирет РИА Новости ырчынын фондунун өкүлүнө таянуу менен.
Классикалык ыр чеберчилигинин дүйнөлүк жылдызы, уникалдуу меццо-сопрано Елена Образцова Германияда дүйшөмбү күнү 12-январда 76 жаш курагында дүйнөдөн кайтты. Анын өлүмүнө жүрөгүнүн токтоп калышы себеп болду.
"Маркум менен коштошуу шаршемби күнү, 14-январда саат 11.00дө Чоң театрда өтөт, ал эми 15-январда саат 09.00дө “Христос Спаситель” храмында христиандык сөөк узатуу диний ырым-жырымдары өткөрүлгөндөн кийин саат 11.00дө Елена Образцованын сөөгү Новодевичьево көрүстөнүндө коюлат", — деп билдирди фонддун кызматкери.
Саясатчылар, дүйнөлүк искусство ишмерлери жана улуу ырчынын жөн гана күйөрмандары россиялык опера ырчысы Елена Образцованын көз жумгандыгына байланыштуу аза күтүп, анын туугандарына жана жакындарына көңүл айтышат.
Өз көңүл айтууларын Россиянын жана Белоруссиянын президенттери, өкмөт башчылары жана башка саясий ишмерлер билдиришти.
"Елена Васильевна Образцова — орустун улуу ырчысы, кайталангыс чебер, зор жаратуучулук күчкө жана чыныгы ички кадыр-наркка ээ адам кайтыш болду. Елена Образцованын чыгармачылыгы менен бүтүндөй өмүрү — искусствого жана элге жан-дили менен кызмат кылуунун, бийик руханий жана адеп-ахлак идеалдарына берилгендиктин жаркын үлгүсү", — деп айтылат Кремлдин сайтында жарыяланган Владимир Путиндин кайрылуусунда.
Дүйнөлүк опера жылдыздары, музыка жамааттары жана опера театрлары көрүнүктүү орус меццо-сопранонун көз жумгандыгына байланыштуу аза күтүүдө.
"Кош бол, менин сүйүктүү Карменим", — деп жазган атактуу испан тенору, Жорж Бизенин “Кармен” операсы боюнча ырчынын сахнадагы өнөгү Пласидо Доминго өзүнүн Facebook бетинде.
""Ла Скала" театры Елена Образцованын, театрдын тарыхындагы Вердиден Веризмге чейинки, француз операсынан орус операсына чейинки репертуарларды кучагына алган кайталангыс мезгили менен байланышкан ырчынын дүйнөдөн кайткандыгы жөнүндө кабарды терең кайгыруу менен кабыл алды", — деп айтылат атактуу театрдын билдирүүсүндө.
Елена Образцова эмнеси менен белгилүү
Россиялык меццо-сопрано, СССРдин эл артисти Елена Образцова 1939-жылы 7-июлда Ленинград шаарында туулган. Анын концерттик кенен репертуарына XVIII-XX кылымдардын жүздөн ашуун композиторлорунун опералык, камералык чыгармалары, кантаталуу-ораторийлери, диний музыкасы, орус ырлары, эски романстар, классикалык оперетта, зонгдор жана джаз чыгармалары кирет. Ал Георгий Свиридовдун чыгармаларын өзгөчө көп аткарган. Композитор "Александр Блоктун чыгармаларына карата он ыр” музыкалык циклин ырчыга арнаган жана ал үчүн Сергей Есениндин "Отчалившая Русь" ыры боюнча башында баритон үчүн жазган өзүнүн поэмасынын атайын жаңы редакциясын жараткан.
