БИШКЕК, 13-янв — Sputnik. Эки даталуу юбилейге дал келген бокс боюнча эл аралык турнир Бишкек шаарында өтө турганын дене тарбия жана спорт боюнча мамлекеттик агенттиктин маалымат кызматы бокс боюнча улуттук курама команданын машыктыруучусу Адылхан Бекболотовго шилтеме берүү менен билдирди.
Машыктыруучунун айтымында турнир 28-январдан 1-февралга чейин Кааба уулу Кожомкул атындагы спорт сарайында өтөт.
"Быйыл эки даталуу юбилейга туш келди. Ал: Советтер Союзунун Баатыры Дүйшөнкул Шопоковдун 100 жылдыгы жана Улуу Жеңиштин 70 жылдыгы. Быйылкы турнирге 10 мамлекеттин спортчулары катышат жана ал буга чейинки өткөрүлгөндөрдөн да престиждүү болот. Биринчи жолу Таиланд, Монголия, Эстония жана Литва мамлекеттеринен спортчулар катышат. Жалпысынан 160 боксчу катышары пландалууда", — деди Бекболотов.
Жалпысынан Дене тарбия жана спорт агенттигинин бюджетинен 1 миллион 200 миң сом бөлүнгөн. Турнирге Казакстан, Кытай, Тажикстан, Түркмөнстан, Өзбекстан, Россия, Таиланд, Монголия, Эстония Литва жана Кыргызстандын командалары катышат.
