БИШКЕК, 29-дек — Sputnik. Ош шаарында Токтогул Сатылгановдун 150 жылдыгына карата чыгарылган ыр-күүлөрүнүн жыйнагы элге таратылды. Бул иш-чараны Ош шаарынын мэриясы жана Ош шаардык жаштар иштери боюнча комитет уюштурду. Бул туурасында Ош шаарынын маалымат кызматы билдирди.
Токтогул Сатылгановдун чыгармалар топтому жазылган 500 даанадан ашуун диск шаардык жүргүнчүлөрдү ташуу агенттигине, билим берүү башкармалыгына, аймактык кеңештерге таратылды.
Бул кампанияга Ош шаарынын вице-мэри Ильичбек Эргешов, жаштар комитетинин төрагасы Камчыбек Досматов жана комитет кызматкерлери, шаардагы маршруттук каттамдардын бригадирлери, жол кайгуул кызматынын кызматкерлери жана мектеп директорлору катышты.
"Кыргыз элинин тарыхын, маданиятын, салт-санаасын жана тарыхый улуу кыргыз инсандарынын чыгармаларын кийинки муундарга сактап өткөрүп берүү биздин милдеттерибиздин бири. Токтогул Сатылганов улуу комузчу-композитор катары өчпөс от калтырган талант. Ушундай иш-чараларды өткөрүү менен шаар тургундарына, коомдук транспорттун жүргүнчүлөрүнө кыргыз күүлөрүн тартуулап, кеңири жайылтканга аракет кылабыз деген ойдобуз", — деди вице-мэр.
Улуу акындын чыгармаларын даярдоого 45 миң сомдун тегерегинде каражат сарпталгандыгын Ош шаардык мэриясынын маалымат кызматы билдирди.
