Таш-Көмүр шаарында шагыл аралаш таш түшүп, Бишкек — Ош жолунда унаа каттамы түнү менен жабык турду. Бул туурасында Sputnik Кыргызстан агенттигине күбө Бекболот Жумакадыров билдирди.
Ал жүргүнчү катары Бишкектен Ошко бара жаткан.
Сход горных пород на трассе Бишкек — Ош
© Фото / Бекболот Жумакадыров
"Түнкү саат 01.00 чамасында "Кара-Көл" постуна барып токтогонбуз. Унаалардын баш-аягы көрүнбөйт, бир нече чакырымга чейин тизилип турду. Түнү менен ошол жерде жатып эртең мененки саат 7.00дөрдө өттүк. Бир унаа бата турган жол ачылыптыр", — деди күбө.
Өзгөчө кырдаалдар министрлигинин маалыматы боюнча жааган жаандын кесепетинен кечээ, 25-июнда, болжол менен саат 20:00дө Таш-Көмүр шаарындагы (трассанын 431-433-чакырымдарында) тоо боорунун үч жеринен, жалпы көлөмү болжол менен 7000 метр куб шагыл, таш түшүп, жолду жаап калган. Бактыга жараша, жабыркагандар жана кыйроолор жок.
Жеринде эки техника жана 16 куткаруучу иштеп, саат 03:00дөр чамасында жол бир тараптуу ачылганы айтылат. Ага чейин Жол кыймылы коопсуздугун камсыздоо башкы башкармалыгынын сегиз экипажы автоунааларды көзөмөлдөп турган. Учурда жолду кеңейтүү иш-чаралары уланууда.
