Борбор калаадагы Bishkek Park соода борборуна бомба коюлду деген маалымат аныкталган жок. Бул тууралуу Улуттук коопсуздук боюнча мамлекеттик комитеттен билдиришти.
Эскерте кетсек, буга чейин аталган соода жайга укук коргоо органдарынын өкүлдөрү келип, имаратты курчоого алып, ичиндегилерди чыгарып жатканы маалымдалган. Андан соң соода жайына жардыруучу зат коюлганы тууралуу маалымат түшкөнү кабарланган.
"Имарат жана ага жанаша аймактар текшерилип, жыйынтыгында кандайдыр бир шектүү буюмдар жана жардыруучу заттар табылган жок. Учурда соода жана оюн-зоок борбору мурдагы калыбында иштеп, милиция кызматкерлери курчоону алды", — деп айтылат маалыматта.
Ушу тапта УКМК телефон чалган адамды аныктап табуу боюнча ыкчам-издөө иштерин улантууда.
