"Сулууну автоунаа кагып кетти". Биринчи жардамды кантип көрсөтүш керек

Sputnik Кыргызстан агенттиги бул жолу жол кырсыгына кабылган адамга кантип алгачкы жардамды көрсөтүү керектигин билип көрдү.

Жабырлануучуга жардам көрсөтүү боюнча кеңештерди даярдоого Кызыл Ай жана Кызыл чырым коомунун адистери жардам берди.

Сунуштар:

• Эгер унаа кагып кеткен адамдын омурткасы жабыркаганын байкасаңыз, аны жулкулдатпаңыз;
• Ордунан жылдырууга аракет кылбаңыз. Эгер чын эле омурткасы же башка жери жабыр тарткан болсо, сиздин ар бир кыймылыңыз ага жардам бербей эле, тескечисинче зыянын тийгизет. Ошондой эле Тез жардам кызматынын ишин тоскоолдотот;
• Жол кырсыгына күбө болсоңуз, эң биринчи өз коопсуздугуңузга кам көрүңүз. Андан кийин гана жабырлануучуга жардам кыла аласыз;
• Экинчиден, кырсык болгон жерди жолдогу ары-бери өткөндөр да билиши үчүн атайын белгилер менен көрсөтүңүз;
• Качан гана жабырлануучу жаткан жер коопсуз экенине көзүңүз жеткенде, ага алгачкы жардам көрсөтүүгө киришсеңиз;
• Адамдын эси ооп калган жокпу  аныктаңыз;
• Эгер эс-учун жоготуп койгон болсо, дем алуусун текшериңиз. Ал үчүн башы кандай абалда турса дагы жылдырбай туруп тыңшайсыз;
• Киши дем алып, Тез жардам кызматы келе жатса, жабырлануучуга тийбеңиз;
• Дем албай калса,  биринчи жардам көрсөтүү боюнча атайын билимиңиз жок болсо, жабырлануучуга тийбей эле койгонуңуз оң.
• Эгер адам жаткан жер ал үчүн кооптуу болсо, ошол убакта гана жылдырууга уруксат берилет;

Эскертүү: Жогорудагы кеңештердин кайсы бири туура эмес аткарылып же жардамы тийбей калган учурга Кызыл Ай жана Кызыл чырым коомунун адистери жана Sputnik Кыргызстан маалымат агенттиги жоопкер эмес.

Сууга чөккөн адамга биринчи жардамды кантип көрсөтүү керек экенин Sputnik Кыргызстандын материалынан тааныша аласыз>>