Тыныбекова, Жолдошбеков, Аманбеков. Жылдын мыкты спортчулары аныкталды. Сүрөт

БИШКЕК, 24-дек. — Sputnik. Жаштар иши, дене тарбия жана спорт агенттиги 2019-жылдын мыкты спортчуларына сыйлык тапшырды. Бул тууралуу аталган мекемеден билдиришти.

Салтанаттуу иш-чара Бишкектеги бизнес борборлордун биринде болгон. Ага вице-премьер Алтынай Өмүрбекова, Спорт агенттигинин директору Канат Аманкулов, Жогорку Кеңештин депутаттары, федерация президенттери, машыктыруучулар жана спортчулар катышкан.

Спорттун олимпиадалык түрлөрү боюнча мыкты спортчу жана машыктыруучу наамын алгандар:

1. Айсулуу Тыныбекова — кыз-келиндер күрөшү боюнча дүйнө чемпиону, Азиянын үч жолку чемпиону, эл аралык турнирлердин көп жолку чемпиону, 2012-2016-жылдары Олимпиада оюндарына катышкан, 2020-жылы өтө турган Токио Олимпиадасына жолдомо алган;

Нурбек Изабеков — КРдин эмгек сиңирген машыктыруучусу.

2. Улукбек Жолдошбеков — эл аралык даражадагы спорт чебери, быйыл 23 жашка чейинкилер арасында эркин күрөш боюнча дүйнө чемпиону жана Азия чемпиону, 2018-жылы өткөн Азия чемпионатынын коло медалынын ээси;

Сүймөнкул Таабалды уулу — КРдин эмгек сиңирген машыктыруучусу.

Спорттун олимпиадалык эмес түрлөрү боюнча мыкты спортчулар жана алардын жеке машыктыруучулары:

1. Жыргалбек Оросбаев — 2019-жылы өткөн пауэрлифтингдин НОДА версиясынан дүйнө кубогунун күмүш медалынын ээси;

Аднан Джабраилов — КРдин эмгек сиңирген машыктыруучусу, СССРдин спорт чебери, пауэрлифтинг НОДА боюнча башкы машыктыруучу.

2. Жалалдин Абдувалиев — паратриатлон боюнча эл аралык даражадагы спорт чебери, 2018-жылдагы Азия чемпионатынын коло медаль ээси, 2019-жылкы Азия кубогунун коло медалынын ээси;

Андрей Ханадеев — спорт чебери, Абдувалиевдин коштоп жүрүүчүсү.

3. Авазбек Аманбеков — эл аралык даражадагы спорт чебери, 2013-жылкы кикбоксинг боюнча дүйнө чемпиону, кикбоксинг боюнча жабык имарат ичиндеги V Азия оюндарынын жана 2017-жылы өткөн таймаш өнөрлөрү боюнча чемпиону, 2019-жылы кикбоксингдин лоу-кик жана фул-контакт түрлөрү боюнча дүйнө чемпиону;

Маралбек Давлеткулов — КРдин эмгек сиңирген машыктыруучусу.

Спорттун улуттук түрлөрү боюнча мыкты спортчулар жана алардын жеке машыктыруучулары:

1. Бектуркан Кожомуратов — эл аралык даражадагы спорт чебери, 2019-жылы кыргыз күрөшү боюнча Азия чемпионатынын жана Улуттук көчмөндөр оюндарынын чемпиону аталган;

Осмонбеков Азамат — Кожомуратовдун жеке машыктыруучусу.

Мындан тышкары, массалык спорттун өнүгүшүнө салым кошкондорго, нормативди мыкты тапшыргандарга кубок, сертификаттар берилген. Ошондой эле бир катар адамга дене тарбия жана спорттун отличниги жана спорттун ардагери наамдары ыйгарылган. Сыйлык ээлери менен кененирээк шилтеме аркылуу таанышууга болот.