Кыргыз спорт күйөрмандары үчүн табышмак болуп турган 22 жаштагы спортчу тууралуу кызыктуу фактыларды спорттук баяндамачы Кабыл Макешов айтып бермекчи.
1. Тариэл Жаркымбаев 1996-жылы Бишкек шаарында төрөлгөн. Биатлон жана лыжа жарыштары боюнча Кыргызстандын көп жолку чемпиону. 2017-жылы Алматы шаарында өткөн Бүткүл дүйнөлүк студенттердин кышкы универсиада оюндарынын ачылыш аземинде Кыргызстандын желегин көтөрүп чыккан. Бул ирет дагы Пхенчхан шаарындагы Олимпиаданын ачылыш салтанатында кыргыз туусун көтөрүп чыгуу шыбагасы Жаркымбаевге буюрду.
3. Кумир туткан спортчулары. Кышкы олимпиада чемпиону жана дүйнөнүн сегиз жолку чемпиону, норвегиялык биатлончу Тарьей Бёго суктанат. "Ал экөөбүздүн атыбыз бир аз окшоп кетет, жакшы шарт түзүлсө ушул спортчудай болсом"деп тилек калат. Мындан тышкары, "дүйнөгө таанымал, Олимпиаданын жана дүйнөнүн көп жолку чемпиону, норвегиялык спортчу Уле-Эйнар Бьерндален сыяктуу 40-45 жашка чейин мелдештерге катышсам" дейт.
4. Студент спортчу. Учурда Кыргыз мамлекеттик дене тарбия жана Спорт академиясында билим алууда. Келечекте Кыргызстанда анча жайыла бербеген кышкы спорт боюнча машыктыруучу болсом, жаштарга ушул спорттун сырларын үйрөтсөм деп жүрөт.
5. Кендирди кескен каражат. Көкөй кескен маселеси — заманбап лыжасы жана кундагы жеке өзүнө ылайык мылтыгынын жоктугу. Ата-энеси сатып берген лыжага жана жабдууларга каниет кылып келет. Спортчунун атайын кийимдеринен сырткары, эле эң арзан классикалык лыжанын наркы 1000-1500 АКШ долларына барабар. Кымбаты бир автоунаанын кунуна тете.
Кабыл Макешов буга чейин кышы сонун кыргызда кышкы спорттун эмнеге өнүкпөй жатканына ой калчап, буга чейин кышкы Олимпиада оюндарына катышкан кыргызстандыктарды тизмектеген.
