БИШКЕК, 15-июл. — Sputnik. Улуттук коопсуздук боюнча мамлекеттик кызматтын тергөө абагы карантинге жабылды деген маалымат чындыкка дал келбейт. Бул туурасында Sputnik агенттигине аталган мекеменин маалымат кызматы кабарлады.
Белгилей кетсек, абак убактылуу жабылганын буга чейин айрым ЖМКлар жазышкан. Анда мурдагы өлкө башчы Алмазбек Атамбаевдин жактоочусу Сергей Слесарев ал жакта бардык жолугушууларга тыюу салынып, эч кимди киргизбей жатканын айтып берген. Слесаров өзү пневмония менен ооруп жаткандыктан Атамбаевдин абалы тууралуу маалыматы жоктугун кошумчалаган.
Депутат бийликти алмаштырууга чакырык жасаганбы. УКМК иликтеп баштады
"Бул маалымат чындыкка туура келбейт. УКМКнын тергөө абагы бүгүнкү күндө штаттык режимде иштеп жатат. Айыпталып жаткандар жактоочулары менен бардык санитардык эрежелерди сактап, тагыраагы, айнек аркылуу жолугуп жатат. Адвокаттар өздөрү ооруп жаткандыктан жолугушууга келе албай жатышат", — деп айтылат маалыматта.
Ошондой эле буга чейин эки тараптуу пневмония диагнозу коюлуп, дарыланып чыккан Алмазбек Атамбаевдин абалы тууралуу дагы маалымат берилди.
"Учурда Атамбаевдин абалы канааттандырарлык. Жакында эле аны ЖК депутаттары келип көрүп, ден соолугунан кабар алышты", — деп жазылган билдирмеде.
Буга чейин бир нече жолу УКМК кызматкерлеринин арасында коронавирус жуктуруп алгандар бар экендиги айтылып, бирок маалымат төгүндөлгөн болчу.
