БИШКЕК, 28-апр. — Sputnik. Үй карантинин бузган алты жаран административдик жоопкерчиликке тартылат. Бул тууралуу Республикалык ыкчам штабдын жыйынында ички иштер министринин орун басары Мирлан Каниметов билдирди.
“Атайын мобилдик тиркеме аркылуу дагы 151 адамдын үй карантин режимин бузгандыгы аныкталды. Алар боюнча тийиштүү текшерүүлөр жүргүзүлүп жатат. Жоруктар жөнүндө кодекстин 127-беренесине ылайык санитардык-эпидемиологиялык эрежелер бузулгандыгы үчүн 20 миң сомдон 60 миң сомго чейин айып пул каралган”, — деди Каниметов.
Мындан улам биринчи вице-премьер Кубатбек Боронов коронавируска чалдыккандар менен байланышта болгон жарандардын үй карантинин сактоосуна көзөмөлдү күчөтүүнү тапшырды.
Коронавирустун кесепети
Кыргызстанда COVID-19 жуктуруп алгандардын саны 708ге жетип, анын жарымынан көбү, 416сы айыкты. Тилекке каршы, вирус сегиз кишинин өмүрүн алды.
Ушу тапта Кыргызстанда абал кандай болуп жатканын Sputnik агенттиги жүргүзүп жаткан тексттик трансляциядан билүүгө болот.
Sputnik Кыргызстан редакциясы карантин учурунда ар тараптан жардам бере турган кызматтардын ишеним телефондорун жана облустардагы комендатура, штабдардын номерлерин жарыялаган.
