БИШКЕК, 24-апр. — Sputnik. Саламаттык сактоо министринин орун басары Нурболот Үсөнбаев өзгөчө абал режиминин мөөнөтү бүткөндөн кийин деле чектөөлөр толугу менен алынбай турганын эскертти.
Ага брифинг учурунда карантин бүткөндөн кийин эл жеке коопсуздугуна кандай кам көрүшү керектиги боюнча суроо узатылды.
“Ар бир кишинин жоопкерчилиги өсө турган маал келди. Өзгөчө абалдын тартибин жеңилдеткенде жайбаракат ары-бери басып, социалдык аралыкты буза баштасак, ушуга чейин жасалган аракеттин баары текке кетчүдөй. Ошондуктан үй шартындагы карантинге алынгандар эрежени тыкыр сакташы керек. Ошол эле учурда ар бирибиз гигиеналык эрежелерге так болуп, күн жылып калды, үйлөрдү желдетип, таза кармаганды, аралыкты сактаганды үйрөнсөк аябай жакшы болот эле. Башка мамлекеттерден көрүп жатабыз, көчөдө экиден ашык киши чогулбайт, 1,5-2 метр аралыкты сактап жатышат. Баарын так аткарып, абал калыбына келүүдө”, — деди Үсөнбаев.
Мындан улам ал Кыргызстанда дагы абалды турукташтыруу үчүн баарылап жапа тырмак аракеттенүү керектигин белгиледи.
“Экономиканы жандантуу үчүн жакынкы күндөрдө этап-этабы менен ишканалар иштей баштайт. Алардын да санитардык нормаларды сактоосуна тыкыр көзөмөл жүргүзүлөт. Тартипти аябай катуу сакташыбыз керек”, — деп эскертти министрдин орун басары.
Коронавирустун кесепети
Өлкөдө учурда абал кандай болуп жатканын Sputnik Кыргызстан агенттиги жүргүзгөн тексттик трансляциядан билүүгө болот.
Sputnik редакциясы карантин учурунда ар тараптан жардам бере турган кызматтардын ишеним телефондорун жана облустардагы комендатура, штабдардын номерлерин жарыялаган.
Кабарларды ыкчам, ыңгайлуу шартта окуу үчүн Telegram каналыбызга баш багыңыз.
