БИШКЕК, 8-апр. — Sputnik. Ош шаардык балдардын жугуштуу илдеттер ооруканасы штаттык режимде иштеп жатат. Оорукана жабылган жок. Бул тууралуу башкы дарыгер Кайрат Абжалов Sputnik Кыргызстан агенттигинин жергиликтүү кабарчысына билдирди.
Анын айтымында, коронавируска кабылган беш дарыгер ооруканага жаткырылган.
"Алар менен байланышта болгон 36 медкызматкер обсервацияга алынды. Алардын айрымдарын алдын ала текшерүүгө жаткырышты. Калган кызматкерлер иштеп жатат", — деди Абжалов.
Эске сала кетсек, бүгүн, 8-апрель күнү, брифинг учурунда саламаттык сактоо министри Сабиржан Абдикаримов Жалал-Абад шаарындагы жугуштуу илдеттерди дарылоочу оорукана убактылуу жабылганын билдирген. Андан соң министрликтин маалымат кызматы Абдикаримов жаңылгандыгын, Жалал-Абад облустук ооруканасы эмес, Ош шаарындагы оорукана жабылат деген маалымат тараткан.
Жалал-Абад облустук клиникалык ооруканасынын башкы дарыгери Кумар Ботокараев да жугуштуу оорулар бөлүмү жабылды деген маалымат чындыкка дал келбей турганын билдирди. Анын айтымында, айыккан бейтаптарды чыгарып, бөлүмдө дезинфекциялоо жумуштары жүргөн. Бүгүн, 8-апрель күнү, 10 бейтапты чыгаруу пландалып жатат.
