Молдомуса Конгантиевдин аты көчөгө эмне үчүн берилди. Бийликтин түшүндүрмөсү

© Sputnik / Павел Лисицын / Медиабанкка өтүүМурдагы ички иштер министри Молдомуса Конгантиев. Архив
Мурдагы ички иштер министри Молдомуса Конгантиев. Архив - Sputnik Кыргызстан
Жазылуу
Конуштагы көчөлөргө Молдомуса Конгантиев менен кошо Ички иштер министрлигинин дагы үч генералынын ысымы коюлган.

БИШКЕК, 23-окт. — Sputnik. Бишкектин четиндеги Алтын-Ордо конушундагы (Полиция шаарчасы) көчөгө мурдагы ички иштер министри Молдомуса Конгантиевдин ысымы ыйгарылды. Бул туурасында Sputnik Кыргызстан агенттигине Чүй облусунун Аламүдүн районунун акиминин биринчи орун басары Эмил Чакибаев билдирди.

Буга чейин социалдык тармактын колдонуучулары "Конгантиевдин кайсы эмгеги үчүн көчөгө ысымы берилди?" деген таризде талкуу жаратышкан.

Акимдин орун басарынын айтымында, өткөн жылы жергиликтүү жашоочулар чогулуш өткөрүп, көчөлөрдүн атын өзгөртүүнү суранышкан. Мындан улам Көк-Жар айылдык кеңеши 2018-жылдын 5-октябрында токтом чыгарган.

"Конуштагы көчөлөрдү ар ким ар кандай атап жүрөт. Негизи ал жерде көбүнчө милиционерлер жашайт. Буга байланыштуу көчөлөргө ИИМдин белгилүү генералдары Жусуп Акматов, Темиркан Субанов, Чыныбек Алиев жана Молдомуса Конгантиевдин ысымы ыйгарылды. Конгантиев өзү кайрылып, атын берүүнү суранган эмес", — деди Чакибаев.

Буга чейин аталган конуштагы көчөлөрдүн аты болгон эмес. Башкы план боюнча 1-көчө, 2-көчө деп ирети менен аталып калган.

"Географиялык объектилерди атоо, аталышын өзгөртүү, географиялык аталыштарды эсепке алуу жана каттоодон өткөрүү тартиби жөнүндө" жобо төмөндөгүдөй:

Географиялык объектилердин ачылышына, изилденишине, өздөштүрүлүшүнө тике катышкандардын ысымдары, ошондой эле чыгаан мамлекеттик жана коомдук ишмерлердин, илимдин, маданияттын өкүлдөрүнүн, мамлекет алдында эмгеги сиңген дагы башка кишилердин ысымы шаарларды, шаарчаларды, дагы башка калктуу конуштарды эске албаганда, аты жок географиялык объектилерге өзгөчө учурларда ыйгарылса болот.

Ошондой эле Маданият, маалымат жана туризм министрлиги кайсы бир адамга эстелик орнотууга, көчөгө, музейге жана башка объектилерге ысымын ыйгарууга каза болгондон беш жыл өткөндөн кийин уруксат берүү боюнча мыйзам долбоорун сунуштаган.

Молдомуса Конгантиев 2010-жылдагы Апрель коогалаңына чейин ички иштер министри болуп эмгектенген. Ал Таласта бийликке каршы чогулган эл тарабынан катуу сабалган.

Конгантиевге карата Апрель окуясы боюнча кылмыш иши козголуп, кызмат абалынан кыянаттык менен пайдалануу жана шалаакылык беренелери боюнча айыпталган. Бирок ушул жылдын июль айында Биринчи Май райондук соту тарабынан күнөөсүз деп табылган.

Жаңылыктар түрмөгү
0