Тергөө менен иштешмекчи болгон Шамил Атаханов үй камагына чыкты

БИШКЕК, 8-июн. — Sputnik. Кримтөбөл Азиз Батукаевдин абактан мыйзамсыз бошотулушу боюнча жүрүп жаткан сотко чейинки териштирүүнүн алкагында экс-вице-премьер Шамил Атаханов үй камагына чыкты. Бул тууралуу укук коргоо органдарындагы ишенимдүү булак билдирди.

Чечимди Биринчи Май райондук соту чыгарган.

Буга чейин ИИМ маалымат таратып, №1 тергөө абагында кармалып турган Атаханов тергөө менен иштешүүгө даярдыгын билдиргени үчүн баш коргоо чарасы өзгөргөнүн айткан.

Учурда тергөө иштери уланып жатат.

Батукаевдин иши

2019-жылдын 17-апрелинде башкы прокурор Өткүрбек Жамшитов Жогорку Кеңеште отчёт берип жатып Батукаевдин мыйзамсыз бошотулушу боюнча кылмыш иши жанданганын билдирип, көп өтпөй Батукаевге диагноз койгон онколог, лаборатория кызматкери камакка алынган. Андан кийин ошол кезде Саламаттык сактоо министрлигин жетектеп турган Динара Сагинбаева, ЖАМК төрагасынын мурдагы кеңешчиси Калыбек Качкыналиев, ошол учурда вице-премьерликти аркалаган Шамил Атаханов камакка алынган.

Кийин Сагинбаева үй камагына чыгарылган.

Аламүдүн райондук соту Батукаевди 16 жыл 8 айга эркинен ажыраткан. Соттун чечими менен жаза мөөнөтүнүн жарымы өткөндө абактан чыгарылган.

Көп өтпөй Батукаевди камактан бошотуу өкүмүн чыгарган Нарын шаарынын мурунку судьясына да кылмыш иши козголгону белгилүү болду.

Ал эми 3-июнда ошол кезде башкы прокурор болуп турган Аида Салянова да суракка чакырылып, 5-июнда Биринчи Май райондук соту аны 26-июнга чейин камакка алуу өкүмүн чыгарган.

Батукаев бошонуп кеткен кезде ЖАМКты жетектеп туран Зарылбек Рысалиев да 7-июнда суракка чакырылып, Ички иштер министрлигинен өзүн жаман сезип, ооруканага түшкөн. Дарыгерлер анын экинчи ирет инсультка кабылышы мүмкүн экенин божомолдошууда.