Наиль Насретдинов рак кеселинин төртүнчү (операция жасалбай турган) баскычтагысынан азап чегип келет.
"Ооруну басаңдатуучу дары-дармексиз жашай албайм. Жамбаш сөөк, чычаңдын тушунда теннис тобу коюлгандай шишик бар. Операция кылууга болбойт, шишик өтө эле чоң. Онкологдор буга тек гана химия терапия менен коштолгон шоолага кактоо жардам берерин айтышат", — деди Наиль.
Улуттук статистикалык комитеттин маалыматы боюнча жыл сайын 5,5 миң кыргызстандык онкологиялык кеселге чалдыкканы аныкталат, анын ичинде жүзгө жакыны — жаш балдар.
Ушул тапта өлкөдөгү жаман кеселден жапа чеккендерге нур тездеткич — бардык ткань жана органдарда пайда болгон арты кайырсыз шишиктерди дарылоодо колдонулчу радио-нур аппараты зарыл. Бул жабдык шишикке жогорку кубаттуулуктагы рентген нурларын жеткирүүнү камсыздайт, мында нур шишикти гана жабыркатып, айланасындагы таза ткандарга зыян тийгизбейт.
Аппарат сатып алууга бөлүнгөн 10 млн. доллар кайда?
Centerra Gold Inс компаниясы Онкология жана гематология улуттук борбору үчүн аталган аппаратты жана башка медициналык жабдыктарды сатып алууга былтыр 10 миллион доллар бөлүп берген. Каржылык көмөк кыргыз өкмөтү менен болгон келишимдин алкагында көрсөтүлгөн.
Натыйжада фонду таркатылып, алардын ишинин жыйынтыгы жокко чыгарылган.
Жабдык Кыргызстанга качан алып келинет?
Наиль Насретдинов бул аппарат менен дарыланууга Санкт-Петербургда 1,5 миллион рубль сарптаган. Мындан тышкары, турак жай жана тамак-аш чыгымдары да бар эмеспи.
"Шоолага кактоо процедурасынын акысы Питерде Израиль же Түштүк Кореяга салыштырмалуу арзан. Мен беш "химия" курсунан өтүп, андан соң химия-нур терапиясынан 25 сеанс алдым. Жыйынтыгы кийин белгилүү болот… Мага окшогондор өлкөбүздө көп. Аларга кол сунууга ашыкпагандары өкүнүчтүү", — деп улутунат Наиль.
Нур тездеткичин сатып алуу Онкология жана гематология улуттук борборунун башчысы Эрнис Тилековдун жоопкерчилигинде. Ал жабдыкты тендер өткөрүүдөн кийин гана сатып алууга болорун, эң тез дегенде ушул жылдын соңунда алынарын түшүндүрдү.
"Тендер өткөрүүгө документтерди комиссия даярдамакчы. Анын катарына кимдер кирери бир-эки ай ичинде аныкталат", — деди Тилеков.
Анын айтымында, аппаратты өлкөгө эки компания алып келе алат. Кокус бузулуп калса деп эки тездеткич сатып алуу пландалууда. Тилеков билдиргендей, аларга 4 миллион доллардын тегерегинде сарпталып, калган каражатка магниттик-резонанстык томограф, наркоздук-дем алуучу аппарат, реанимациялык бөлүм үчүн көп функциялуу медициналык керебеттер жана башка жабдыктар сатып алынат.
Онкологиялык кызматты колдоо фондусунун мүчөсү болгон Жогорку Кеңештин депутаты Айсулуу Мамашова тездеткичти сатып алуучу каражатты мамлекетке бюджетке которуу туура чечим деп эсептейт.
"Фондуну текшерүү жана анын ишмердигине көз салуу татаал. Ал эми бюджеттен сарпталганда баары ачык жүрөт", — деп билдирди Мамашова.
Тездеткич сатып алууга акча топтоо демилгеси бир нече жыл мурун жарыялаган. Болгону 60 миң доллар жыйналган. Канадалык компания тездеткичти сатып алууну каржылай турганы айтылганда чогулган каражатты госпиталдык мектеп түзүү жана рак илдетин аныктоо сапатын жакшыртууга жумшоо чечими кабыл алынган.
