Депутат Асылбек уулунун кош жарандыгы эмнеге текшерилген эмес? Маморгандардын жообу

БИШКЕК, 22-фев. — Sputnik. Казакстандын Тышкы иштер министрлиги Алматыда атайын операция учурунда кармалган Дамирбек Асылбек уулу Казакстандын жараны экенин айтып, 22-февралда Кыргызстандын Тышкы иштер министрлигине нота жөнөткөн.

Кыргызстандын Конституциясына ылайык, кош жарандуулукка уруксат берилет. Бирок саясий мамлекеттик кызматтарды аркалагандар менен соттор эки мамлекеттин жараны боло албайт. Депутаттык саясий мамлекеттик кызматка кирет.

Дамирбек Асылбек уулу Казакстандын жараны экени аныкталгандан кийин ал депутат болордо эмнеге кош жарандыгы текшерилген эмес деген суроо жаралды. Sputnik Кыргызстан агенттиги ага жооп издеп көрдү.

Борбордук шайлоо комиссиясынын төрага орун басары Абдыжапар Бекматов Дамирбек Асылбек уулу шайлоо алдында "Кыргызстан" партиясынын съездинде бекитилген тизме менен талапкер катары катталганын айтты.

"Талапкерлер тууралуу тиешелүү документтер менен бирге Кыргыз Республикасынын жараны экенин тастыктаган паспорттун көчүрмөсү да тиркелет. Ошол бизге талапкер Кыргызстандын жараны экенин тастыктай турчу документ болуп эсептелет. Соттолгондугу же башка мамлекеттин жараны экенин жашырып койгону үчүн негизги жоопкерчилик жарандын өзүндө болот", — деди ал.

"Кыргызстан" фракциясынын лидери Алмазбек Батыралиев менен байланышып, түшүндүрмө алууга мүмкүн болгон жок. Ал эми аталган партиянын башчысы Канат Исаев учурда убактылуу тергөө абаганда.

Ички иштер министрлигинин маалымат кызматы депутат болом дегендер алгач текшерилерин маалымдады.

"Бирок биз жарандын сот жоопкерчилигине тартылган-тартылбаганын гана карайбыз. Кош жарандуулукту аныктоо менен алектенбейбиз", — деди маалымат кызматы.

Мамлекеттик каттоо кызматынын маалымат катчысы Мелис Эржигитов мекеменин маалымат базасында депутат Кыргызстандын жараны деп катталганын, КР жарандыгынан чыкпаганын белгиледи.

"Башка мамлекеттин жараны экенин текшерүү биздин милдетибизге кирбейт", — деди Эржигитов.

Улуттук коопсуздук мамлекеттик комитетинин маалымат кызматынан түшүндүрмө алууга мүмкүн болгон жок.

Ким текшериши керек?

Бул суроого Боршайкомдун төрагасынын орун басары Бекматов жооп берди.

"Эч бир мамлекеттик орган текшербейт. Тургундун паспорту Кыргызстандын жараны экенин тастыктап турат. Биз көптөгөн мамлекеттер менен кызматташтабыз, андыктан алардын бардыгына сурам жөнөтүү мүмкүн эмес", — деди Бекматов.

БШК төрагасынын орун басары эгер депутаттын башка мамлекеттин жараны экени аныкталып, расмий документтер келип түшсө, мыйзам боюнча мандатынан ажырай турганын айтты. Мыйзамдагы бул кемчиликти кандай жол менен жойсо болот деген суроого ал мыйзамды аткаруучу органда иштегендиктен жооп бере албай турганын кошумчалады.

Казакстанда атайын операция учурунда кармалган кыргызстандык жарандар кайсы беренелер менен айыпталууда?