Казакстанга Азиядан күмүш алып берген депутат Дамирбек Асылбек уулу тууралуу 7 факты

Казакстандын күч органдары чек ара аймактарында контрабанда менен алектенген уюшкан кылмыштуу топтун мүчөлөрүн кармоо үчүн атайын ири операция жүргүзүп 35 шектүү адамды кармаган. Анда Кыргызстандын үч жараны да колго түшүрүлүп, алардын бири депутат Дамирбек Асылбек уулу экени аныкталды. Ал эми Жогорку Кеңештин маалымат кызматы эл өкүлү акыркы жолу жыйынга 15-февралда катышканын билдирди.

Мындан улам Sputnik Кыргызстан агенттиги эл өкүлүнүн эмгек жолуна көз чаптырып 7 факты даярдады.

1. Спорт мектебинде окуган. Бала чагынан тарта грек-рим күрөшү менен машыгып аймактар аралык мелдештерде жогорку көрсөткүчтөргө жетише алган. 8-классты бүткөндөн кийин Бишкекке келип, 

Шералы Сыдыков атындагы республикалык олимпиадалык резервдер окуу жайынан билим алган. Мындан сырткары, Жалал-Абад коммерциялык институтунун экономика факультетин "Бухгалтердик эсеп" адистиги боюнча бүтүргөн. КР Дипломатиялык академиясынын эл аралык мамилелер факультетинин "дүйнөлүк экономика" кафедрасында "Экономика чөйрөсүндө дипломат" адистиги боюнча магистратура окуган.

2. Жетекчилик кызматтарда…

2000-2004 — "АРМS" ЖЧКсынын башкаруучу директору;

2006-2008 — "Sky-Mobile" ЖЧКсынын атайын кат-кабарларды кайра иштеп чыгуу кызматы бөлүмүнүн башчысы;

2008-2009 — "БиМаКом" ЖЧКсынын башкы директорунун кеңешчиси;

2010-2015 — "Альфа Телеком" ЖАКында компаниянын кызыкчылыгын коргоо жана мамлекеттик органдар менен байланыш боюнча координатор.

3. Үч чакырылышка үч башка партия менен аттанган. Саясатка алгач 2009-жылы келип, "Ак Жол" партиясынын тизмеси менен 28 жашында Жогорку Кеңеш депутатынын мандатына ээ болгон. Апрель революциясынан кийин "Республика" партиясынан 33-болуп шайлоого аттанган. Бирок шайлоодо "Республика" партиясы 23 мандатка гана ээ болгондуктан депутаттык орун буюруган эмес. Ал эми 2015-жылы өткөн парламенттик шайлоодо "Кыргызстан" саясий партиясынын курамы менен депутат болуп шайланган.

Конституциялык мыйзамдар, мамлекеттик түзүлүш, сот-укуктук маселелер жана Жогорку Кеңештин регламенти боюнча комитетинин төрагасынын орун басары.

Парламенттер аралык бирликтин (ПАБ) Жаш парламентчилер форумунун кеңешинин мүчөсү.

4. Мал-мүлкү. Дамирбек Асылбек уулу 2016-жылга карата декларациясында киреше булагы катары жылына 654 миң сом айлыгын гана көрсөткөн. Ага ылайык, өздүк унаасы, бизнеси, жада калса турак жайы да жок. Бирок жакын туугандарына таандык эки батири бар экени жазылган.

5. Азияны багындырган балбан. 2012-жылдан тарта Кыргыз Республикасынын күрөш федерациясынын биринчи вице-президенти. 2013-жылдан ушул мезгилге чейин "AAWC" спорттук күрөшү боюнча Азия кеңешинин вице-президенти болуп саналат.

Грек-рим күрөшү боюнча эл аралык класстагы спорт чебери;

1997 — Словениянын Марибор шаарындагы дүйнөлүк чемпионатта үчүнчү орунду ээлеген;

1999 — Ирандын Тегеран шаарында өткөн Азия чемпионатында жеңишке жетип, Азия чемпиону болгон;

1999 —Бишкекте өткөн Орто Азия оюндарынын чемпиону;

2004 — Казакстандын Алматы шаарында Азия Кубогу мелдешинде биринчи орунга татыган;

2006 — "Голден Гран При" турниринин серияларында чемпион болгон жана байге жеңип алган.

6. Казакстанга Азиядан күмүш алып берген. Учурунда Казакстанда дагы бир жылдан ашуун жүрүп келген.. Натыйжада 2001-жылы Монголиянын Улан-Батор шаарында өткөн Азия чемпионатында коңшу өлкөнүн желегин көтөрүп чыгып күмүш медаль багындырган. Бул маалыматты анын машыктыруучусу Мейрамбек Ахметов да тастыктайт. Ошондой эле ал убагында Казакстандын желегин желбиреткенин "Кыргызстан" фракциясы да расмий билдирүүсүндө белгилеп өткөн.

7. Сыйлыктары. Кыргыз Республикасынын Жогорку Кеңешинин 70 жылдыгына карата юбилейлик медаль, Дөлөн Өмүрзаков атындагы мекемелик сыйлык, Рамзан Кадыров атындагы медаль, Эл аралык FILA күрөш федерациясынын ордени менен сыйланган.