БИШКЕК, 31-янв. — Sputnik. Премьер-министр Сапар Исаков Тажикстандагы ТЭЦ электр энергиясын гана иштеп чыккандыктан анын баасы арзан болушу мүмкүн экенин депутаттарга билдирди.
Учурда Исаков Жогорку Кеңеште Бишкек ТЭЦинде болгон кырсык боюнча депутаттарга маалымат берип, суроолоруна жооп берүүдө.
"Адистер Тажикстандагы ТЭЦ электр энергиясын гана иштеп чыгарын айтып жатышат, биздики болсо эки режим (электр энергиясын иштеп чыгат жана шаардыктарга жылуулук берет – автор.) менен иштейт. Андыктан баасы кымбат болду. Ошентсе да 386 миллион доллар кайда кетти деген суроолор көп болууда. Алардын бардыгын биргеликте иликтеп чыгалы", — деди Исаков.
Белгилей кетсек, 26-январдын кечинде көп кабаттуу үйлөрдөгү батареялар муздап баштаганын тургундар социалдык тармактарга жазышкан. Кийин Бишкек ТЭЦиндеги эски буу казандарга суу берген куур жарылганы белгилүү болгон. Кырсыктын кесепеттери 30-январда гана жөнгө салынып, шаардыктардын үйүнө жылуулук берүү калыбына келе баштаган.
