БИШКЕК, 24-янв. — Sputnik. Вице-премьер Дайыр Кенекеев Бишкек — Ош жолундагы май ташуучу унаанын кырсыкташы боюнча жумушчу кеңешме өткөрдү. Бул тууралуу өкмөттүн маалымат кызматы билдирди.
Эскерте кетсек, 38 тонна май ташып бараткан унаа 20-январь күнү Бишкек — Ош унаа жолунун 264-чакырымында Чычкан суусуна кулап, анын кесепетинен бир адам каза тапкан.
Транспорт жана жолдор министрлигинин маалыматы боюнча бүгүнкү күндө күйүүчү-майлоочу майлар Бишкек — Ош жолу аркылуу машина менен жеткирилет. Бирок аталган маршрут өзгөчө кыш мезгилинде абдан татаал болуп эсептелинет.
"Күйүүчү-майлоочу материалдарды коопсуз ташууну камсыз кылуу максатында вице-премьер Дайыр Кенекеев тийиштүү мамлекеттик органдарга күйүүчү жана майлоочу майларды республиканын түштүгүнө темир жол менен жеткирүү мүмкүнчүлүгүн кароо, Өзбекстан менен темир жол аркылуу жүк ташуу тарифтерин төмөндөтүү боюнча маселени иштеп чыгуу тапшырмасын берди", — деп айтылат маалыматта.
Кенекеев ошондой эле жүк ташуучу унаалардын жол кырсыгын азайтуу максатында түшүндүрүү иштерин жүргүзүү керектигин белгиледи.
