Жол тандабастарга тагылган окшош номерлер кайдан чыккан

Жазылуу
Буга чейин окурмандар Бишкекте окшош мамлекеттик номер тагылган жол тандабастар бар экенин билдирген. Мамлекеттик каттоо кызматынын билдиришинче, эки автоунаа тең бир кишиге таандык

БИШКЕК, 5-янв. — Sputnik. Жол тандабастарга тагылган окшош номерлерди буга чейин номер жасаган компаниянын жардамы менен жасап алышы мүмкүн. Мындай божомолду Мамлекеттик каттоо кызматы билдирди.

31-декабрда Lexus-570 менен Gelandewagen үлгүсүндөгү жол тандабастарга мамлекеттик окшош номерлер тагылганын Sputnik Кыргызстан агенттигине күбө билдирген. Автоунаалар Жукеев-Пудовкин менен Саманчин көчөлөрүнүн кесилишиндеги Кусеин Карасаев атындагы Бишкек гуманитардык университетинин жатаканасынын алдында токтоп турган.

Мамкаттоонун билдиришинче, Lexus 570 менен Gelandewagen үлгүсүндөгү автоунаа бир кишинин атына катталган.

"Мамлекеттик окшош номерлерди колдонуу, албетте, мыйзамсыз. Мамкаттоо бир эле окшош номерди эки жолу бериши мүмкүн эмес. Андай учурда система ката кетти деп билдирмек. Айдоочу окшош номерлерди жасатып алышы боюнча бир нече вариант бар. Мамлекеттик номердин көчүрмөсүн 2015-жылдын 31-декабрына чейин мамлекеттик номерлерди жасап жүргөн компаниянын жардамы менен жасатышы мүмкүн. Ошондой эле мамлекеттик номерди жасаган жергиликтүү жана чет элдик компаниялар дагы көп", — деп Мамкаттоо түшүндүрмө берди.

Ошондой эле мамлекеттик номерди жасап келген компаниянын жабдыктары дагы деле бар экенин аталган мекеме билдирди. Бул окуя тийиштүү кызматтар тарабынан тыкыр иликтениши керектиги белгиленди.

Мыйзамга ылайык, жалган мамлекеттик номерди колдонгондорго соттун чечими менен 5 миң сомго чейин айып салынат.

Жаңылыктар түрмөгү
0