БИШКЕК, 19-дек. — Sputnik. НТС телеканалынын имаратына болжол менен кечки саат 17:00дөр чамасында сот аткаруучулар милиционерлердин коштоосунда келип, имаратты жапканга аракеттерди көргөнүн каналдын кызматкерлери билдиришти.
Каналдын башкы директору Жайнак Үсөн уулу азыр кеңсеге бара жатканын, окуя менен толук таанышкандан кийин толугураак маалымат берерин Sputnik Кыргызстан агенттигине билдирди.
Каналдын кызматкерлеринин айтымында, учурда имарат толугу менен курчоого алынып, ичине эч ким киргизилбей жатат.
"Сот аткаруучулар келип мүлктөрдү камакка алып, имаратты жаап кетишерин айтышты. Ошондой эле ишиңерди токтоткула дешти", — деди кызматкерлер.
Учурда сыртта ондон ашык милиция кызматкери турганын кызматкерлер белгилешти.
Бишкек ШИИБдин маалымат кызматы милиционерлер коомдук тартипти сактоо үчүн окуя болгон жерде экенин, ал эми имаратты курчоого алды деген маалымат чындыкка жатпай турганын билдирди.
