БИШКЕК, 16-окт. — Sputnik. Таласта митингге чыккандар тарай баштады. Бул тууралуу Sputnik Кыргызстан агенттигинин кабарчысына аймактык ИИБден билдиришти.
Бүгүн, 16-октябрь күнү облустун борборуна Өмүрбек Бабановдун 600гө жакын тарапташы митингге чыкты. Алар таза шайлоо өткөрүүнү талап кылышкан.
"Учурда аянтта 100-150 адам калды. Эл акырындап тарап жатат. Шаар тынч. Митингге чыккандар провокациялык аракеттерди жасаган жок", — деп ИИБден маалымдашты.
Ал эми Бабановдун шайлоо штабы митингге эч кандай тиешеси жок экенин билдирди.
Талас облусу Өмүрбек Бабановдун кичи мекени. Шайлоонун алдын ала маалыматтары боюнча талапкер Талас облусунан 85 пайыз добуш алган. Ал эми республика боюнча 33,74 пайыз добушка ээ болгон. Алдыда 55 пайызга жакын добуш алган Сооронбай Жээнбеков келе жатат.
Таласта учурда абал кандай экенин Sputnik Кыргызстан агенттиги жүргүзүп жаткан тексттик трансляциядан окуп таанышсаңыз болот>>
