БИШКЕК, 3-июл. — Sputnik. Талас облусунун аймагында 1-июлда агымы катуу сууга түшүп кетип каза болгон журналисттердин бири Элмира Сүйүтбекова ошол күнү түшкү саат 12:32де социалдык тармакка жаркылдаган маанайдагы пост жазган.
Сүйүтбекова Facebook тармагына катталгандардын эки миллиардга жеткендигине даярдалган видеону өздүк баракчасына бөлүшүп, "Мага жакты, сонун! Мен үчүн бул көз ирмемдер менин тарыхым" деп жазган экен.
Социалдык тармактагы адамдар анын жанга жагымдуу жаркылдаган адам экендигин эскерип жатышат.
Ал эми кесиптештеринин бири каңырыгы түтөп коштошуп, алардын сүрөтүн койгон.
Каза болгондордун экинчиси Сүйүн Өмүрбеков Next TV каналынын аткаруучу директору болуп иштеп келген. Ал кесиптеши сууга түшүп кеткенде куткарам деп артынан дарыяга кирген….Тилекке каршы, кесиптеши да, өзү да кайра тирүү чыкпай калды.
Бакай Абдымалик аттуу дагы бир кесиптеши алардын жарык дүйнөдөн узап кетишине ишенбей тургандыгын жазды.
Мирбек Айтикеев "Калган өмүрүңөрдү бала-бакыраңарга берсин. Абдан жакшы адамдар элеңер" деп эскерүү менен маркумдардын жакындарына көңүл айткан.
Сүйүн Өмүрбековдун артында үч кызы жана кош бойлуу колуктусу калды. Анын сөөгү 2-июлда Бакай-Ата айылында жерге берилди.
Ал башында экономист кесибине ээ болгон. 2003-жылы облустук китепканада укук маалымат борборунун жетекчиси, 2008-2009-жылдары "Газпром" ишканасында менеджер, андан кийин Таластагы банктарда беш жыл эмгектенген. 2014-жылдан бери Next TV каналынын аткаруучу директору кызматын аркалап келген.
Элмира Сүйүтбекованын үч кыз, бир уулу бар эле. Аны акыркы сапарга узатуу зыйнаты 3-июлда Талас шаарында өттү.
Ал 2002-жылы Талас мамлекеттик университетинин филология факультетин аяктагандан кийин мектепте мугалим болуп иштеген. 2007-жылы Талас облустук телеканалына жумушка орношуп, кийинчерээк КТРКнын аймактык кабарчысы болуп беш жылдай иштеген. Быйыл июнь айынан тарта жаңы ачылган жергиликтүү 3-каналда эмгектенип жаткан. Шаардык кеңешке быйыл өткөн шайлоодо "Мекеним Кыргызстан" партиясынан шайланган болчу.
