Кош, Канат! Мен сени комуздун буулуккан үнүнөн издейм...

© Фото / Ринат МурзаевКомузист Канат Токтобек уулу
Комузист Канат Токтобек уулу - Sputnik Кыргызстан
Жазылуу
Канат Токтобек уулунун элесине

Жарыгым ай… Жашоонун даамын эми татаарда жайраган кулунчагым ай…

Ажал — улук, өлүм — ак экенине дагы бир ирет ынанып турсак да, азыркыга чейин ак булутка айланып кетишиңе түк ишене албай, дендароо болуп турган кезибиз. Неге шаштың, карагым?!

Ырчы Токтобек Асаналиевдин архивдик сүрөтү - Sputnik Кыргызстан
Булбул үндүү Токтобек Асаналиев 42 жашта! Ырчы тууралуу 6 факты
Өбөктөп өөдө боло албаган атаңдын, көзүнөн кан аккан апаңдын колунда желбиреген желеги эмес белең. Сенин ар бир ийгилигиңе сыймыктанып, улуу өнөрдү аркалап калган талантың үчүн төбөсү көккө жетип отурган атаңдын бели сынбадыбы…

Сенин ордуң да атаң үчүн башка эле, басса-турса "киши болсо экен, бутуна тургузуп койсом экен" деген тилеги таш капты. Эмки күн кандай болорун аңдай албай, алдастап, мүңкүрөп…

Ымыркай кезиңден чапанына ороп, медер тутуп багып-каккан, карааныңа жалынып отурган чоң атаң менен чоң энең үйгө батпай, жерге батпай, ааламга батпай калбадыбы, катыгүн ай! Же көңүлгө төтөп, мурунга жыт болгудай сенден туяк калсачы…

Комуздан үн чыкпай калды… Баралыңа келгенде топту жарган өнөрпоз болмоксуң, бекеринен сени айтылуу Ашыралы Айталиев "бала Карамолдо" атабагандыр. Кудай берген тубаса шык-жөндөмүң болбосо тайкүлүк кезиңде Түркияга барып, канча деген жеткинчектин арасынан баш байге алып келбейт элең…

…Мен сенин ак жүзүңдү, жоодур көзүңдү комуздун буулуккан үнүнөн издейм, жашыл ыраң бел-белестен издейм, шаңшып чыккан ырдан издейм, сен теңдүү уландардын сөзүнөн издейм, издей берем. Жакшы атанын уулу, жакшы жердин тукуму элең…

Последняя фотосессия писателя Чингиза Айтматова в КР - Sputnik Кыргызстан
Айтматовсуз 9 жыл. Үлкөндүн караанын издегенде
Эми агарып аткан таң да СЕНСИҢ, кызарып баткан күн да СЕНСИҢ, беттен сылап салкын соккон жел да СЕНСИҢ, себелеп жааган ак жаан да СЕНСИҢ! Эми БААРЫ — СЕНСИҢ, КАНАТ, КАКЕШ!

Көп ойлор, ак тилектер бар эле, бирок Кудайдын бешенеге жазган өзүнүн заң-мыйзамы бар экен… Бөбөктөрүңдү аман кылгай… Эми ошолордон бир ууч топо буюрсун бизге.

Ушул менин сага деген аспиетим, сага деген кызматым, сага деп койгон гүлчамбарым болсун. Тынч жатагой, жарыгым…

Жаңылыктар түрмөгү
0
Алгач жаңыларыАлгач эскилери
loader