БИШКЕК, 30-июн. — Sputnik. Рак илдетине кабылган "Кыргызстан чүрөгү — 2013" наамынын ээси Жибек Нукеева өз өмүрү үчүн күрөшүн улантып, шишикке каршы күчтүү дарыларды ичип, химия терапиядан өтүп жатат. Бул тууралуу Sputnik Кыргызстан агенттигине Жибектин эжеси Медина Нукеева билдирди.
Ал эми коомдук ишмер Ассоль Молдокматованын айтымында, учурда Жибектин жанында үй-бүлөсү жана жакындары бар.
"Жибек учурда Бишкек шаарында, биз анын сакайып кетерине ишенебиз. Жанында сүйүктүү жары, ата-энеси, туугандары жана эжелери Медина менен Мария бар. Баардык дары-дармеги жана клиникаларда дарылануусу өзү убада кылгандай эле ишкер Бабур Тольбаев тарабынан төлөнүп жатат", — деди Молдокматова.
Эске салсак, Жибек Нукееванын оорусу тууралуу суук кабар өткөн жылдын аягында социалдык тармактарда тараган. Жибек өзү Facebook баракчасы аркылуу элге жардам сурап кайрылган.
Жибек шоу-бизнес өкүлдөрү, ишкерлер жана карапайым кыргызстандыктар тарабынан кайрымдуулук жолу менен чогулган каражатка Италия, Израиль жана Түркиянын клиникаларына барып дарыланып келген.
