БИШКЕК, 22-июн. — Sputnik. Бишкектеги "Чыгыш-5" кичи районунда Болот Мамбетов атындагы көчөнүн жээгинде бардык бактарды кыйып салышканын Sputnik Кыргызстан агенттигине жергиликтүү тургун билдирди.
Анын айтымында, бактарды кыюуда "Зеленстрой" ишканасынын кызматкерлери абдан шашылышты.
"Бактарды бат эле кыйып салышты. Эртең менен сегизден тарта 10.30га чейин бир дагы бак калган жок. Тамырына чейин казып алышып, унааларга жүктөп кетишти. Абдан көп адам шашылып иштешти", — деди жашоочу.
Ал эми "Зеленстрой" ишканасынын Свердлов району боюнча жетекчиси Билимбек Кыдыргычев Sputnik Кыргызстан агенттигинин кабарчысына билдиргенине караганда, кыйылган 52 бактын 41и кооптуулук жараткан абалда болчу.
"Алардын ордуна көчөнү бойлотуп 128 дарак отургузулуп, 850 чарчы метр аянт жашылдандырылат", — деди ал.
Ал эми мэриянын маалымат кызматы аталган райондун тургундары менен шаар жетекчиси Албек Ибраимов Мамбетов көчөсүндөгү жол оңдоо иштерин көргөнү барганда кезиккенин айтты.
Эгер кандайдыр бир окуяларга күбө болуп, сүрөт, видео тартсаңыз Sputnik Кыргызстан агенттигинин 0706 566 544 WhatsApp номерине билдириңиз.