БИШКЕК, 6-фев. — Sputnik. Баткен менен Жалал-Абаддагы аэропорттун учуп конуу тилкесине жакын жердеги жер тилкелери элге мыйзамсыз берилгенин Башкы прокуратуранын маалымат кызматы билдирди.
Башкы көзөмөл орган өлкөдөгү аэропорттордун учуп-конуу тилкесине жакын жердеги турак-жайлардын, курулуштардын мыйзамдуулугун текшерген.
"Текшерүү маалында "Баткен" жана "Жалал-Абад" аэродромдорунун учуп-конуу тилкесине жакын жердеги аймактарга жеке турак жай жана башка имараттарды курууга жергиликтүү өзүн-өзү башкаруу органдары жер тилкесин мыйзамды бузуу менен бөлүп берген. Бул жерлерде мыйзамсыз курулган 20дан ашуун имараттар аныкталды", — деп айтылат маалыматта.
Ошондой эле Баткен" жана "Жалал-Абад" аэродромдору 1970-жылдан бери иштеп келгенине карабастан шаардын башкы планына киргизилбегени текшерүү учурунда аныкталды.
Аталган фактылар боюнча прокуратура тарабынан тийиштүү мамлекеттик органдарга жер жана шаар куруу мыйзамдарынын бузулушу боюнча керектүү чараларды көрүү сунушталган.
2017-жылы 16-январда эртең менен "Манас" аэропортуна жакын жердеги Дача айылына жүк ташуучу учак кулап, 39 киши каза болуп, 16 киши түрдүү жаракаттарды алган. Кырсыктын-чоо жайын Мамлекеттер аралык авиациялык комитет иликтеп жатат.
