БИШКЕК, 4-сен. — Sputnik. Жогорку Кеңеш бүгүн, 4-сентябрда, өз ишин баштады. Жыйындар залында оркестрдин коштоосу менен КРдин гимни аткарылды.
Төрага Дастан Жумабеков депутаттарды ишке чыгышы менен куттуктап, бүгүнкү жыйынга каттоодон 95 депутат өтүп, кворум бар экенин айтты.
Жумабеков парламенттеги комитеттер өз ишин баштоосу керектигин айтып, бардык депутаттарга ийгилик каалап, жыйын аяктады.
Ал эми Жогорку Кеңештин депутаты Мирлан Жээнчороев регламентке ылайык пленардык жыйын 12-сентябрда башталарын кошумчалады.
Депутаттар жайкы эс алууга июнь айынын биринчи аптасында кеткен. Sputnik Кыргызстан агенттиги эл өкүлдөрү эс алууга кетээр алдында Жогорку Кеңештин төрагасы Дастан Жумабековду маекке тартып, депутаттардын ишмердүүлүгү, аларга карата айтылган сын-пикирлер боюнча пикирин уккан.
