ЖКга 2016-жылдын отчетун бере элек акыйкатчынын "тагдыры" кылдын учунда

Жазылуу
Депутаттын айтымында, акыйкатчынын маселеси жаңы жылга чейин Жогорку Кеңештин жалпы жыйынында каралып, кызматын улантар-улантпашы чечилет.

БИШКЕК, 15-дек. — Sputnik. Акыйкатчы Кубат Оторбаевдин 2016-жылкы отчету үстүбүздөгү жылдын апрель айынан бери угула элек. Себеби ал сегиз айдан бери Жогорку Кеңешке келип баяндамасын жасаган жок. Бул тууралуу Sputnik Кыргызстан агенттигинин кабарчысына КСДП фракциясынан депутат Рыскелди Момбеков билдирди.

Белгилей кетсек, бүгүн, 15-декабрда, КСДП фракциясынын жыйынында акыйкатчынын ишмердүүлүгү боюнча маселе каралды.

"Акыйкатчынын жылдык отчету жыл сайын апрель айында угулат. Кубат Оторбаев 2016-жылдын отчетун сегиз ай мурун жакташы керек эле. Бирок ал бир да жолу келген жок. Бүгүн дагы белгисиз себептер менен жыйынга келбей калды", — деди Момбеков.

Депутаттын айтымында, акыйкатчынын маселеси жаңы жылга чейин Жогорку Кеңештин жалпы жыйынында каралып, кызматын улантар-улантпашы чечилет.

Работа станции скорой помощи им. А. С. Пучкова в Москве - Sputnik Кыргызстан
Россия акыйкатчысына КР жарандары жабыркаган жол кырсыктарын көзөмөлдөө сунушталды
"2018-жылдын апрелинде акыйкатчы 2017-жылдын отчетун бериши керек. Ошондуктан парламент өткөн жылдын отчетун эмки жылга калтырбай быйыл угат. Менимче жаңы жылга жетпестен маселе парламенттин жалпы жыйынында каралып, отчетун кабыл алуу же кабыл албоо чечими чыгарылат. Отчет кабыл алынбаса кызматынан четтеди дегенди билдирет", — деди Момбеков.

Sputnik Кыргызстан агенттиги акыйкатчынын өзү менен байланышууга аракет жасады, бирок анын уюлдук аппараты өчүк болууда. Ал эми маалымат кызматынын өкүлү Абсамат Талантбек уулу Оторбаев учурда ооруп жатканын билдирди.

"Акыйкатчы кечээтен тарта ден соолугуна байланыштуу дарыланып жатат. Бул боюнча фракциянын катчылыгына 14-декабрда маалымат берилген. Ал эми отчет боюнча айтсам, биз бардык маалыматты даярдап ЖКга бир нече ирет барганбыз, бирок ар кандай себептерден улам каралбай калып жатты. Жалпысынан акыйкатчы ЖКга ден соолугуна байланыштуу эки ирет бара алган жок", — деди Талантбек уулу.

Ал ошондой эле учурда акыйкатчы менен телефон аркылуу байланышууга мүмкүн болбой жаткандыктан алдыдагы кадамдары тууралуу айта албастыгын кошумчалады.

Жаңылыктар түрмөгү
0