БИШКЕК, 21-авг. — Sputnik. Кыргызстандын премьер-министри Сооронбай Жээнбеков ээлеген кызматынан кетерин жарыялады. Бул тууралуу ал Борбордук шайлоо комиссиясына президенттикке расмий талапкер катары катталгандан кийин журналисттерге билдирди.
Ал президенттик шайлоого КСДП партиясынын атынан бирдиктүү талапкер катары көрсөтүлгөн.
"Тарапташтарым мени шайлоо бүткөнчө кызматтан кетпей турушумду суранды. Мен баарын салмактап туруп, кызматты тапшыруу боюнча чечим кабыл алдым. Шайлоого бирдей атаандаштыкта катышкым келет. Жеңишке ишенбей туруп шайлоого барбайт болчумун. Ишенген үчүн катышып жатам", — деди Жээнбеков.
Эскерте кетсек, президенттик шайлоо 15-октябрда болот. Азырынча эки талапкер — Темир Сариев жана Өмүрбек Бабанов расмий каттоодон өттү.
