БИШКЕК, 9-фев. — Sputnik. Мамлекеттик каттоо кызматынын төрагасы Тайырбек Сарпашев президенттик шайлоонун алдында айрым саясий күчтөр анын отставкага кетүүсүнө кызыкдар болуп жатканын АКИpress агенттигинин түз эфиринде билдирди.
Буга чейин Башкы прокуратура Тайырбек Сарпашевди кызматтан бошотуу сунушун премьер-министр Сооронбай Жээнбековго жолдогон.
"Айрым саясий күчтөргө президенттик шайлоонун ачык өтө турганы жакпай жатат. Кээ бир саясатчылар биометрикалык база Мамлекеттик каттоо кызматынын колунда болгондуктан шайлоого таасир этүү мүмкүн деп ойлоп жатышат. Бирок алар катуу жаңылышат. Менин жеке оюм боюнча айрым саясий күчтөр президенттик шайлоону Сарпашевсиз өткөрүүгө кызыкдар", — деди Мамкаттоонун төрагасы.
Ал ошондой эле Башкы прокурор Индира Жолдубаева менен премьер-министр Сооронбай Жээнбековдун атына арыз жазып, шашылыш чечим чыгарбоого чакырган. Сарпашев Мамкатоо соттун чечимин гана аткарганын белгилеген.
"Башкы прокурордон бул ишти өз көзөмөлүнө алуусун суранам. Индира Жолдубаева саясатташкан деп айтпайм, бирок укук коргоо органдарынын айрым кызматкерлери бул маселени жакшы карабай калган болсо керек. Эгер мыйзам бузган болсом, жоопкерчиликтен качпайм", — деди Сарпашев.
Мамкаттоо төрагасы бейшемби күнү эртең менен премьер-министрге кайрылганын белгиледи. Ал эми "президентке дагы кайрыласызбы" деген суроого жетекчиси өкмөт башчы болгондуктан азырынча аны менен чектелерин айтты.
