14:06 18 Баш оона 2019
Түз эфир
  • USD69.7979
  • EUR77.3640
  • RUB1.0576
Волейболисттер. Архивдик сүрөт

Волейбол күйөрмандары калысты башка уруп, тополоң салды. Бишкекте тартылган видео

© Sputnik / Владимир Песня
Окуялар
Кыскача шилтеме алуу
1214 0 0

Кыргызстандын волейбол боюнча чемпионатында "Жаңы Муун" командасы "Сулайман-Тоо" клубун 3:0 эсебинде утуп алган.

БИШКЕК, 12-фев. — Sputnik. Волейбол мелдешинде күйөрмандар калыска кол көтөрүп, тополоң чыгарды. Бул туурасында Facebook тармагына колдонуучу Венера Ормонбекова пост жазган.

Ал мелдештеги калыстын айынан "Сулайман-Тоо" клубунун машыктыруучусу дисквалификацияланганын билдирип, башаламан болуп жаткан күйөрмандардын видеосун жүктөгөн.

"Калыска кол салып жатышат. Мындай болбош керек, уят да. Бул жерге милиция коюш керек. Машыктыруучу кызыл карта алгандан кийин сыртка чыгарылышы керек эле", — деп айтылат видеодо.

Тасмадан көк спорттук кийимчен кишиге нааразычылык айтып, ага атырылып жаткан топ адамдарды көрүүгө болот. Ал ортодо бирөө кишини арка жагынан келип башка чаап жибергенге да үлгүргөн. Мындан кийин көк кийимченди тарапташтары коргоп алып чыгып кеткен.

Көп өтпөй Facebook колдонуучусу Венера Ормонбекова Волейбол федерациясынын президенти Элмурза Сатыбалдиевдин окуя боюнча өткөргөн жыйынынын видеосун да жүктөгөн.

Анда Сатыбалдиев күйөрмандардын талоонунда калып, сокку жеген адам мелдештин калысы экендигин айткан.

"Кечээки окуянын көрүп алып аябай ичим ачышты. Күйөрмандарга сын тага албайм. Клубдар бири-бири менен ынтымактуу болушу керек. Мен тиги калысты чапкан баланы тааныдым. Кыргыз эч качан аркасынан келип урган эмес. Арачалап калгандарга рахмат", — деген Сатыбалдиев.

Ошондой эле федерация президенти "Сулайман-Тоо" клубунун машыктыруусун элден кечирим суратып, оюндан убактылуу дисквалификациялаганын айткан.

Sputnik Кыргызстан маалымат агенттиги аталган окуянын чоо-жайын билүү үчүн КРдин Волейбол федерациясы менен байланышты.

Уюмдун башкы катчысы Кылыч Сарбагышевдин айтымында, интернеттеги видео 9-февралда борбордогу Кожомкул атындагы спорт сарайында тартылган. Анда "Жаңы Муун" волейбол командасы "Сулайман Тоо" клубун 3:0 эсебинде уткан.

"Эки команданын оюну бүткөндөн кийин түшүнбөстүктөр жаралып, күйөрмандар эмоцияга алдыргандай болду. Азыр мен окуянын так себебин айта албайм. Себеби утулган "Сулайман тоо" клубу калыстын чечимин кабыл алып, бири-биринен кечирим сурап ынтымакка келишти. Мындайча айтканда, ийне-жибине чейин аныктаганга негиз жок. Машыктыруучусу эскертүү алды. Эгер клуб тараптан протест берилсе, териштирмекпиз. Мындай көрүнүш волейболдо биринчи ирет болуп жатат. Кийинки оюндарда тартип бузуулардын алдын алабыз", — деди Сарбагышев.

Башкы катчы кошумчалагандай, КРдин чемпионатынын биринчи туру 4-10-февраль күндөрү жыйынтыкталган. 2-3-турлары февраль жана март айларында өтөт.

Тема боюнча

Аскерлердин Майлуу-Суудагы чатагы. Бири экинчисин жарадар кылды
Күйөөсү аялын уруп, ортодо таяк жеген наристе көз жумду. Көлдөгү кайгылуу окуя
Белгилер:
чатак, калыс, волейбол, Спорт, Кыргызстан

ЭҢ МААНИЛҮҮ