БИШКЕК, 25-май — Sputnik. 24-майга караган түнү Ысык-Көл жана Нарын облустарында калың жааган кардын айынан чабандардын канча магы өлүп, канчасы жоголгонун ӨКМдин маалымат кызматынан кабарлашты.
Эске салсак, буга чейин Ысык-Көлдө жааган кардын айынан 100дөн ашык, Нарында 200 кой өлгөнү кабарланган.
Көлдүн Ак-Суу району боюнча — 139 кой, үч жылкы, үч кулун, төрт музоо өлсө, Ысык-Көл районунун чабандары 225 кой менен бир уюнан кол жууган. Ошондо облус боюнча 364 кой-эчки, үч жылкы, үч кулун, бир уй жана төрт музоо мерт кеткен.
Ат-Башы району боюнча өлгөн мал тууралуу жаңы маалыматтар жок. Бирок Ак-Сай өрөөнүндөгү Үч-Эмчек жайлоосундагы чабандын 800 баш кой-эчкиси жоголуп, 200ү кайра табылганы айтылды. Калган 600ү изделүүдө.
Маалыматка караганда, Ат-Башынын жайлоолорунда калган малга 65 түк чөп жеткирилди.
Бүгүн, 25-майда, эки облуста тең Жарандык коргонуу комиссиясы тарабынан чыгымдар такталат.
