БИШКЕК, 3-апр. — Sputnik. Баткен районундагы Үч-Дөбө айылында чектеш жашаган кыргыздар менен тажиктердин ортосунда жаңжал чыкты. Бул туурасында Sputnik Кыргызстан агенттигине жергиликтүү тургундар билдирди.
Эки мамлекеттин жарандары коңушалаш жашап келген. Айыл тургунунун айтымында, кыргызстандык жаран чек арага корук курганына тажикстандыктар нааразы болуп чыгышкан.
"Бул маселе эки-үч күндөн бери козголуп жаткан. Аягы мынтип чырлуу аяктоодо. Бүгүн саат 17.00дөрдө эки тараптан 300гө чукул адам чогулуп бири-бирине 15 мүнөттөй таш атып турду. Андан соң милиция, аким келип токтотууга аракет кылган. Жаңжал кайра уланып, эки тарап 20 мүнөтчө бири-бирин ташка алып турду. Бир баланын башы жарылып тез жардам алып кеткенин көрдүм. Учурда токтоп калышкан, эл эки тарапта турат. Акимдер өз ара сүйлөшүп жатышат", — деди айыл тургуну.
Ак-Сай айыл өкмөтүнүн башчысы Эргеш Ниязовдун Sputnik Кыргызстан агенттигинин кабарчысына азыркы тапта эки тараптын жетекчилери өз ара сүйлөшүп жатканын тастыктады.
