БИШКЕК, 19-янв. — Sputnik. Актөбө облусунда 52 кишинин өмүрүн алган автобустагы өрт — кокустук деген пикирин Казакстандын ички иштер министринин орун басары Ерлан Тургумбаев билдирди. Бул тууралуу Sputnik Казакстан агенттиги жазды.
Ал билдиргендей, автобус толугу менен күйүп кеткендиктен, полиция медиктердин жана лабораториянын кызматын пайдаланууга аргасыз.
"Жумуш абдан көп болгондуктан, адистер күндүз ишти бүтүрө албай калып, түнү менен иштеп чыгышты. Буюрса жума күнү түшкө чейин жумуштар аяктап, ошондон кийин гана өрттүн чыгуу себептерин айта алабыз", — деди Тургумбаев.
Каргашалуу окуя Самара — Шымкент унаа жолунун 1068-чакырымында, Калыбай айылынан 10 чакырым алыстыкта болгон. "Икарус" үлгүсүндөгү автобус жүрүп бара жаткан жеринен өрттөнүп, 57 кишинин бешөө гана асан калган.
