Күбө: Бишкектин чок ортосундагы жол кырсыгынан айдоочу тирүүлөй күйүп кетти

БИШКЕК, 5-ноя. — Sputnik. Бишкекте катталган жол кырсыгынан бир жаран тирүүлөй өрттөнүп кеткенин Элан Абдыкеримов социалдык баракчасына жазды.

Ага ылайык, жол кырсыгы Чыңгыз Айтматов проспектисинде жайгашкан Asia Mall соода борборунун маңдайында болгон.

"Эки машина кагышып, бир киши тирүүлөй өрттөнүп кетти. Каза болгондор дагы бар", — деп жазат ал.

Stos2408 аттуу колдонуучу жол кырсыгынын видеосун YouTube сайтына жайгаштырды. Анда жол кырсыгы 5-ноябрда саат 4:30дар чамасында болгону жазылат. 

Алдын ала маалымат боюнча кара түстөгү Toyota Camry проспекти менен ылдый түшүп келе жатып жолдон чыгып, каршы тилкедеги ак түстөгү Toyota Camry менен кагышкан.

"Кара түстөгү автоунаа күйүп баштаганда, өрт өчүрүүчү жабдыкты алып чыгышып өчүрүүгө аракет кылышты. Бирок ал ойдогудай иштеген жок. Айдоочу күйүп кетти. Төрт киши каза болуп, экөө эсин жоготкон", — деп жазат колдонуучу.

Кайгуул милициясы жол кырсыгы боюнча маалымат такталып жаткандыктан канча киши каза болгону боюнча кийинчерээк кабар берилерин билдирди. 

Ал эми шаардык Кайгуул милициясынын маалымат кызматынан түшүндүрмө алууга мүмкүн болгон жок.