БИШКЕК, 2-окт. - Sputnik. Президент Сооронбай Жээнбеков бүгүн, 2-октябрда, Улуттук банктын төрагасы Толкунбек Абдыгуловду кабыл алды. Бул тууралуу өлкө башчынын маалымат кызматынан билдиришти.
Жолугушууда акча-насыялоо саясатын жүргүзүү ишмердиги, банктык жана төлөм системасынын азыркы кырдаалы, ошондой эле өлкөдөгү баа жана финансылык туруктуулукту камсыз кылуу боюнча кабыл алынган чаралар талкууланды.
Жээнбеков өлкөдөгү каржы-кредиттик мекемелердин туруктуу жана ишенимдүү иштөөсүн, Кыргызстандын экономикасын узак мөөнөттүү өнүктүрүү үчүн ишкерлерге жана жарандардын кызыкчылыгында каржылык ресурстарды мобилизациялоо керектигин белгиледи.
“Аймактык өнүктүрүү саясатын ишке ашыруунун алкагында район жана облустардагы экономикалык долбоорлорду колдоо боюнча коммерциялык банктар жана каржы-кредиттик мекемелер менен өз ара иштешүүнү күчөтүү зарылдыгына токтолду”, — деп айтылат билдирүүдө.
Өз кезегинде Абдыгулов Кыргызстанда баалардын туруктуулугу камсыздалганын, 2019-жылдын августунда жылдык инфляциянын көлөмү 2 пайызды түзгөндүгүн белгиледи.
“Улуттук банк 2019-жыл ичинде жалпы көлөмү 36 миллиард сомду түзгөн 27 кредиттик аукцион өткөрдү. Анын ичинде 27 миллиард сом аймактарды өнүктүрүү максаты үчүн кредиттик аукциондордун алкагында сунушталды”, — деди төрага.
Анын айтымында, өлкөнүн төлөм системасы туруктуу өнүгүп, мобилдик банкинг шарттарын өнүктүрүү боюнча пилоттук долбоор, накталай эмес эсептөөнүн заманбап формасы жана өлкөнүн алыскы аймактарында банктык кызматтарды көрсөтүү ишке ашырылууда.
