ЕРЕВАН, 1-окт. — Sputnik. Кыргызстандын президенти Сооронбай Жээнбеков Жогорку Евразия экономикалык кеңешинин кеңейтилген форматтагы жыйынында сөз сүйлөдү. Бул тууралуу Sputnik Кыргызстан агенттигинин кабарчысы билдирди.
Жээнбеков ЕАЭБ күчтүү интеграциялык бирикме боло алганын билдирди. Ал ошондой эле 2018-жылы экономикалык ири державалардын ортосунда соода-сатык жаатында тиреш жүрүп, ЕАЭБдин экономикасына терс таасирин тийгизгенин белгиледи. Анткен менен геоэкономикалык аспектилерди эске албаган күндө деле өз ара соода-сатыктын көлөмү өспөй жатканын дагы кошумчалай кетти.
"Кыска мөөнөттүү пайданын артынан кууган кээ бир өлкөлөр мамлекеттик көзөмөлдү күчөтүп, кошумча тоскоолдуктарды жаратууда. Мындай кадамдар интеграциянын эффективдүүлүгүн басаңдатып жатат. Интеграциялык бирикмелердеги мамлекеттер ташылган товарлардын көлөмүн жогорулатуу менен продукциянын өз баасын төмөндөтүп пайда көрүшү керек. Биз болсо бири-бирибиз менен талашып-тартышып отурабыз", — деди Жээнбеков.
Анын айтымында, ЕАЭБге мүчө өлкөлөрдүн өкмөтү ички рыноктогу тоскоолдуктарды жоюшу керек. Болбосо бирикме өз максатына жете албайт.
