БИШКЕК, 10-окт. — Sputnik. Кыргызстандын өкмөтү Liglass Trading CZ s.r.o. компаниясы менен ГЭС куруу боюнча келишимди бир тараптуу жокко чыгарды. Бул тууралуу өкмөттүн маалымат кызматы билдирди.
Тиешелүү буйрукка бүгүн, 10-октябрь күнү, премьер-министр Сапар Исаков кол койду.
“Өкмөт Liglass Trading CZ s.r.o.компаниясы менен кызматташууну улантуу боюнча эч кандай сүйлөшүүлөрдү жүргүзгөн жок”, — деп айтылат билдирүүдө.
“Сүйлөшүү учурунда компания өкүлдөрү Чехия тарабынан милдеттенмелер аткарылбагандыктан кыргыз тарап келишимди бир тараптуу жокко чыгарары тууралуу маалымдар болушкан”, — дешти өкмөттөн.
Жолугушуу маалында чехиялык компаниянын өкүлдөрү ортодогу пикир келишпестикти жоюу боюнча бир катар сунуштарды айтканы белгиленет.
“Бул сунуштар кыргыз тарап үчүн ылайыксыз болду, анткени, абалды жөнгө салуучу аракеттер буга чейин түзүлгөн келишимде каралган эмес. Мындан тышкары, КР өкмөтү тарабынан кошумча чечимдердин кабыл алынышын шарттайт. Мындан улам сунуштар кабыл алынган жок”, — дешти маалымат кызматтан.
18-сентябрь күнү Liglass жетекчилиги Кыргызстандын өкмөтүнө 37 миллион долларды төлөө мөөнөтүн узартуу суранычы менен кайрылган. Акыркы күн деп 19-сентябрь айтылган болчу. Өкмөт келишимди жокко чыгаруу чечимин кабыл алган. Каражат түшкөн эмес, бирок бийлик чакан ГЭСтер боюнча кепилдик төлөм Кыргызстандын казынасында каларына ишендирип келет. Мында чех тарап сотко кайрылышы толук мүмкүн.
