БИШКЕК, 12-фев. — Sputnik. Кыргызстан Евразия экономикалык биримдигине киргендигине байланыштуу унааларды каттоо боюнча жаңы эрежелер киргизилди. Бул тууралуу өкмөттүн маалымат кызматы кабарлап анын себебин түшүндүрүп берди.
Белгилей кетсек, буга чейин унаа ээлери унааны каттоодо киргизилип жаткан жаңы эрежелер боюнча маалыматтарга чочулап жатышкан.
Аталган эрежелерге ылайык, эми өлкөгө сырттан кирген унаалардын коопсуздугу тууралуу күбөлүк атайын сыноо лабораторияларынан (диагностикалык борборлор) өткөн соң гана берилмей болду.
Бирок, учурда унааларды текшерген мындай лабораториянын жоктугуна байланыштуу унаалардын коопсуздугу боюнча күбөлүктү Мамлекеттик каттоо кызматы жана экономика министрлиги бермей болду.
Мындан тышкары, өкмөт жаңы эрежелерге байланыштуу унаанын коопсуздугу тууралуу күбөлүктү Кыргызстанда берилбейт деген маалыматты төгүнгө чыгарды. Алар аталган унаа документтери Бишкекте жана өлкөнүн ар кыл аймактарында бериле тургандыгын жарыялады.
